हेटौंडाः मकवानपुरको मनहरी गाउँपालिका–७, लामाटोलमा शौचालयको बाल्टिनको पानीमा डुबेर एक बालिकाको मृत्यु भएको छ । इलाका प्रहरी कार्यालय मनहरीका हबल्दार राजकुमार श्रेष्ठका अनुसार आज बुधबार बिहान पौने ९ बजेको समयमा शौचालयको पानीमा डुबेर अचेत अवस्थामा १५ महिने बालिका इशा ब्लोनलाई अभिभावकले भेटेका थिए ।
अचेत अवस्थाकी बालिकालाई प्राथमिक स्वास्थ्य चौकी मनहरीमा उपचारको प्रयास सम्भव नभएपछि चितवन जिल्लास्थित पुरानो मेडिकल कलेज रेफर गरिएको थियो । रेफर गरिएकी बालिकाको चितवन लैजाने क्रममा बाटोमै मृत्यु भएको इलाका प्रहरी कार्यालय मनहरीले जनाएको छ । अभिभावक घरमा नभएको बेला बालिका खेल्ने क्रममा शौचालयमा पानी राख्ने बाल्टिनमा डुबेकी हुन् ।
