हेटौंडाः हेटौंडा उपमहानगरपालिका–१९ स्थित नेवारपानी चोकमा लागुऔषध गाँजासहित २ जनालाई प्रहरीले पक्राउ गरेको छ । पक्राउ पर्नेमा सोही स्थानका अटो चालक २२ बर्षीय सुशील थोकर र अटोमा सवार २३ बर्षीय सुमन गोले रहेको बागमती प्रदेश प्रहरी कार्यालय हेटौंडाले जानकारी दिएको छ ।
बिहीबार गुम्बाचोकबाट हेटांैडा बजारतर्फ आउँदै गरेको प्रदेश ३–०३–००१ ह १८९ नम्बरको अटोलाई सुरक्षाजाँच गर्दा अटोको पछाडी लुकाई छिपाई राखेको बोरामा लागुऔषध गाँजा २ केजी फेला परेको प्रहरीले जनाएको छ । लागुऔषध गाँजासहित थोकर र गोलेलाई नियन्त्रणमा लिई थप अनुसन्धानका लागि जिल्ला प्रहरी कार्यालय मकवानपुरको हिरासत कक्षमा राखिएको प्रहरीले जानकारी दिएको छ ।
