हेटौंडाः बागमती प्रदेशमा मंगलबार र बुधबार भएको विभिन्न घटनामा ५ जनाको मृत्यु भएको छ । यस्तै ४ जना घाईते भएको प्रहरीले बताएको छ । काभ्रे, सिन्धुली र चितवन जिल्लामा ५ जनाको मृत्यु भएको बागमती प्रदेश प्रहरी कार्यालयले जनाएको छ ।
काभ्रे जिल्लाको नमोबुद्ध नगरपालिका–२ बुच्चाकोटमा दुर्घटनामा परी मोटरसाइकल चालक सिन्धुली जिल्लाको दुधौली नगरपालिकाका अन्दाजी २५ वर्षीय सुमन काफ्लेको मृत्यु भएको छ । धुलिखेलबाट भकुण्डेतर्फ जाँदै गरेको प्र १–००१ प ०८८९ नम्बरको मोटरसाइकलले सोहि दिशातर्फ जाँदै गरेको बा प्र ०२६ च ५२१० नम्बरको कार र बिपरित दिशाबाट आउँदै गरेको बा ४ ख ६२७ नम्बरको बसमा ठक्कर खाँदा दुर्घटना भएको हो । दुर्घटनामा परी मोटरसाइकल चालक सिन्धुली फिकल–६ का आन्दाजी ३० वर्षीय कपिल पौडेल घाईते भएका छन् ।
काभ्रेकै पनौती नगरपालिका–६, कार्कीगाउँमा एक युवक मृत अवस्थामा फेला परेको छ । ललितपुर जिल्लाको गोदावरी–७ घर भई काभ्रे जिल्लाको पनौती–६ मा डेरा गरी बस्ने २४ बर्षीय गणेश बल मृत्त फेला परेको प्रहरीले जनाएको छ । यस्तै काभ्रे जिल्लाको भुम्लु गाउँपालिका–१०, बिमिरेमा २१ बर्षीया सानुमाया पहरीको घाँस कटेर आउने क्रममा लडेर मृत्यु भएको छ । यता सिन्धुली जिल्लाको कमलामाई–६ का ५२ बर्षीय ईन्द्र बहादुर शेर्पा आफ्नै घरमा एक्कासी ढल्दा उपचारको क्रममा मुत्यु भएको छ । चितवन जिल्लाको भरतपुर महानगरपालिका–१, नारायणी नदी किनारमा सनाखत नभएको मागी खाई हिँड्ने आन्दाजी २६ वर्षीय एक पुरुष मृत फेला परेको प्रहरीले जनाएको छ ।
यस्तै नुवाकोट जिल्लाको बेलकोटगढी नगरपालिका–९ स्थित सिउरेनीमा भएको सवारी दुर्घटनामा ५१ बर्षीय मोटरसाइकल चालक रामशरण न्यौपाने घाईते भएका छन् । त्रिशुलीबाट कुमरीतर्फ जाँदै गरेको बा ८१ प १५८४ मोटरसाइकल आफैं अनियन्त्रित हुँदा नुवाकोट बेलकोटगढी–२ का न्यौपाने घाईते भएको हो । सिन्धुपाल्चोक जिल्लाको जुगल गाउँपालिका–३ स्थित पागर्पुमा धारिलो हतियार प्रहारबाट ३६ बर्षीय नुर्वु तामाङ घाईते भएका छन् । निजकै ५० बर्षीय भिनाजु बिष्णुलाल तामाङ र निजको ४७ बर्षीय श्रीमती जगमाया तामाङबीच जग्गाको विषयमा विवाद भएको थियो । बिष्णुलालले खुकुरी प्रहार गर्दा नुर्वु घाईते भएको प्रहरीले जनाएको छ । यस्तै सिन्धुली जिल्लाको कमलामाई–६, धुरामा आगलागी हुँदा सोही स्थानका ८० वर्षीया तोला कुमारी थापा घाईते भएकी छन् ।
