हेटौंडाः जिल्ला प्रहरी कार्यालय मकवानपुर मानवश्रोत व्यवस्थापन शाखा कार्यरत प्रहरी निरीक्षक रामचन्द्र घिमिरे जिल्लाकै उत्कृष्ट प्रहरी घोषित हुनुभएको छ । घिमिरेको कार्य मुल्याङ्कन गर्दै जिल्ला प्रहरी कार्यालय मकवानपुरले घिमिरेलाई कार्तिक महिनाको जिल्लाको उत्कृष्ट प्रहरी घोषणा गरेको हो ।
प्रहरी निरीक्षक घिमिरेले आफुलाई सुम्पिएको जिम्मेवारी कुलशलतापूर्वक सम्पादन गरेको विवरणमा उल्लेख छ । असोज ७ गते दिउँसोको समयमा हेटौंडा –११ थानाभर्याङस्थित सडकखण्डमा चेकिङ्ग डिउटीमा खटिएको प्रहरी टोलीले बसामाडीबाट हेटौंडा आउँदै गरेको ना २ ह २३६३ नम्बरको अटोलाई रोकी सुरक्षाजाँच गर्ने क्रममा उक्त अटोमा सवार हेटौंडा–१९ का ६० वर्षीय प्रेम बहादुर थिङ, उक्त अटोको पछाडी सिटमा सवार महिला हेटौंडा–३ बसामाडीकी ४० वर्षीय कविता थिङ र सोही ठाउँकी ३६ वर्षीय सिरसानी मोक्तानले ल्याएको लागूऔषध गाँजा ११ किलो २ सय ग्राम बरामद गरी उनीहरुलाई पक्राउ गरी कानूनी दायरामा ल्याउन अहम भुमिका निर्वाह गर्नुभएको थियो ।
यस्तै, असोज २३ गते राति १० बजेको समयमा हेटौंडा–११ थानाभञ्ज्याङस्थित अनुपा बिकको कोठामा हेटौंडा–६ का २० वर्षीय सुशान्त बिकले १४ वर्षीय नाम परिवर्तित ३१ (०७१/०८०–३८) लाई फकाई विवाह गर्छु भनी प्रलोभनमा पारी पीडितको इच्छा विपरीत जबरजस्ती करणी गरी फरार रहेकोमा सुशान्त बिकलाई पक्राउ गरी कानुनी दायरामा ल्याइएकोे थियो । असोज २५ गते राति ११ बजेर २५ मिनेटको समयमा हेटौंडा–१ जरुवाटोलस्थित भित्री सडकखण्डमा प्रहरी टोलीले बा १८ च ६६०६ नम्बरको स्कारपियो गाडीमा लुकाईछिपाई गरी ल्याएको अवस्थामा लागुऔषध ओनरेक्स १ सय ५८ बोतल फेला पारी र संलग्नलाई पक्राउ गर्न सफल भएको विवरणमा उल्लेख छ ।
