बागमतीः मकवानपुरको बागमती गाउँपालिका वडा नम्बर ४ को आयोजनामा सोमबारदेखि वडास्तरीय फुटबल प्रतियोगिता सुरु भएको छ । वडास्तरीय फुटबल प्रतियोगिताको निर्वाचन क्षेत्र नम्बर १ को प्रदेशसभा ‘क’ का उम्मेदवार प्रेम बहादुर पुलामी छिन्तु र बागमती गाउँपालिकाका अध्यक्ष सर्केश घलानले संयुक्त रुपमा उद्घघाटन गर्नुभयो ।
उद्घाटन कार्यक्रममा उम्मेदवार पुलामीले खेल क्षेत्रको विकासमा जोड दिने बताउनुभयो । उहाँले राष्ट्रिय–अन्तर्राष्ट्रियस्तरका खेल प्रतियोगितामा बागमतीका युवाहरुको सहभागिता हुनुपर्ने बताउँदै त्यसका लागि आवश्यक पूर्वाधार, प्रशिक्षणको व्यवस्था गरिने जनाउनुभयो । यस्तै कार्यक्रमका विशिष्ट अतिथि तथा बागमती गाउँपालिका अध्यक्ष सर्केश घलानले गाउँ–गाउँबाट खेलाडी उत्पादन गर्न पालिकाले खेलकुद प्रशिक्षणलाई जोड दिइने बताउनुभयो । उहाँले छिटै नै एक घर एक खेलाडीको अवधारणा ल्याएर खेलकुद विकासलाई उच्चस्तरमा लैजाने बताउनुभयो ।
वडास्तरीय खेलकुद विकास समिति अध्यक्ष कालमान राईको अध्यक्षतामा भएको कार्यक्रममा गाउँपालिका उपाध्यक्ष फणिन्द्र तिमल्सिना, नेकपा माओवादी केन्द्र बागमती गाउँपालिका अध्यक्ष अरुण बल, नेपाली कांग्रेस पार्टी सचिव सुदिप पाख्रिन, नेकपा समाजवादीका धनपति तिमल्सिना, वडा नम्बर ४ का वडाध्यक्ष दन्तलाल माझी, ३ नम्बर वडाध्यक्ष कमान सिं पाख्रिन, ५ का वडाध्यक्ष बिजय भ्लोन, २ का वडाध्यक्ष जनक पहरी लगायतको सहभागिता रहेको थियो । कात्तिक २५ गतेसम्म चल्ने फुटबल प्रतियोगितामा प्रथम हुनेले नगद ५० हजार रुपैयाँ र दोस्रो हुनेले नगद २५ हजार रुपैयाँ पुरस्कार प्राप्त गर्नेछन् ।
यसैबीच, उद्घाटन खेलमा आयोजक वडा नम्बर ४ ‘बी’ बिजयी भएको छ । आयोजक टिमले वडा नम्बर ५ लाई २–१ गोलअन्तरले पराजित गरेको हो । नकआउट प्रणालीमा हुने फुटबल प्रतियोगितामा बागमती गाउँपालिकाका ९ वटै वडाका १३ वटा टिमको सहभागिता रहेको छ ।
