हेटौंडाः बागमती प्रदेश सरकारले स्थापना गरेको कोरोना भाईरस संक्रमण रोकथाम, नियन्त्रण तथा उपचार कोषमा बैंक अफ काठमाडौले ५ लाख रकम सहयोग गरेको छ । बैंकका हेटौंडा शाखा प्रमुख रमेश प्याकुरेलले बागमती प्रदेशका मुख्यमन्त्री डोरमणि पौडेललाई सहयोग रकमको चेक आज शनिबार हस्तान्तरण गर्नुभयो ।
विश्वव्यापी रुपमा फैलिएको भाईरस नियन्त्रणमा सरकारलाई सहयोग गर्ने उद्देश्यले कोषमा रकम जम्मा गरिएको बैंकले जनाएको छ । महामारीका रुपमा फैलिएको कोरोना भाईरस संक्रमण नियन्त्रणको क्षेत्रमा सरकारले काम गरिरहेको जानकारी दिनुहुँदै बैंकको सहयोग प्रति बागमती प्रदेशका मुख्यमन्त्री डोरमणि पौडेलले धन्यवाद दिनुभयो । सरकारले मात्र चाहेर नहुने भन्दै उहाँले विभिन्न संघ, संस्था, व्यक्तिलगायत सबैको सहयोग जरुरी रहेको बताउनुभयो ।
