हेटौंडाः हेटौंडा–२ स्थित प्रतिफल बचत तथा ऋण सहकारी संस्था लिमिटेडको १० औं स्थापना दिवसको अवसरमा सरसफाई र रक्तदान कार्यक्रम गरिएको छ । सोमबार संस्थाको स्थापना दिवसको अवसरमा हेटौंडा–२ स्थित मनकामना चोकहुँदै मनकामना मन्दिर जाने बाटो हेटौंडा–५ स्थित सिँचाइ टोलसम्मको बाटो सरसफाइ गरिएको छ ।
यस्तै, हेटौंडा–२ मकवानपुर बहुमुखी क्याम्पस अगाडी, वनस्खण्डी गेट, मनकामना चोकस्थित विभिन्न क्षेत्रमा फोहोर फाल्ने २० वटा डस्टविन राखिएको संस्था व्यवस्थापक विनोद पौडेलले जानकारी दिनुभयो । करिब ६० हजार रुपैयाँ बराबरको डस्टविन संस्थाले सौजन्य गरेको उहाँले बताउनुभयो । संस्थाको स्थापना दिवसको अवसरमा रक्तदान कार्यक्रम पनि गरिएको छ । रक्त सञ्चार केन्द्र हेटौंडाको समन्वयमा भएको रक्तदान कार्यक्रममा ३४ जनाले रक्तदान गरेका छन् ।
संस्थाको अहिले सेयर सदस्य १ हजार २ सयभन्दा बढी रहेको पौडेलले जानकारी दिनुभयो । यस्तै १ करोड ३ लाख रुपैयाँ सेयर पुँजी, ४ करोड ८० लाख रुपैयाँ ऋण लगानी र ३ करोड १० लाख रुपैयाँ निक्षेप बचत रहेको उहाँले बताउनुभयो । संस्थाका अध्यक्ष दिलिश गोविन्द जोशीको अध्यक्षता तथा हेटौंडा उपमहानगरपालिकी प्रमुख मिना कुमारी लामाको प्रमुख आतिथ्यतामा भएको कार्यक्रममा हेटौंडा–२ का वडाध्यक्ष विष्णु गोपाल महर्जन र ५ नम्बर वडाको वडाध्यक्ष सुशील घिमिरे, पूर्व मेयर हरि बहादुर महतलगायतको आतिथ्यता रहेको थियो ।
