हेटौंडाः हेटौंडा–२ स्थित मकवानपुर बहुमुखी क्याम्पसले कक्षा ११ को वार्षिक परीक्षाको नतीजा सार्वजनिक गरेको छ । मकवानपुर क्याम्पसले सोमबार नतीजा सार्वजनिक गरेको हो । शैक्षिक सत्र २०७८ मा कक्षा ११ मा भर्ना भएका १ हजार ३ सय ४७ विद्यार्थी मध्ये १ हजार २ सय ८२ जना वार्षिक परीक्षामा सहभागी भएका थिए ।
वार्षिक परीक्षामा १० जना विद्यार्थीले ए प्लस जीपीए ल्याएका छन् भने ५७ जना विद्यार्थी जीपीए ए प्राप्त गरेका छन् । यस्तै जीपीए बी प्लस ल्याउने विद्यार्थी १ सय ८० जना छन् भने ३ सय ७० जनाले जीपीए बी ल्याएका छन् । सी प्लस जीपीए ल्याउने विद्यार्थीको संख्या २ सय ३६ रहेको मकवानपुर बहुमुखी क्याम्पसको परीक्षा शाखाका वरिष्ठ सहायक राजीव सापकोटाले जानकारी दिनुभएको छ । नतीजा मकवानपुर बहुमुखी क्याम्पसको वेभसाइटमा हेर्न सकिने छ । कक्षा ११ को ग्रेडवृद्धिको मौका परीक्षा भने असार २५ गतेका लागि तय गरिएको बताइएको छ ।
जेठ २७ गतेदेखि कक्षा ११ को वार्षिक परीक्षा सुरु गरी असार ३ गते सकिएको परीक्षाको नतीजा तीन साताको अवधिमै सार्वजनिक गरिएको हो । कोभिड–१९ महामारीका कारण वार्षिक शैक्षिक कार्यक्रम प्रभावित हुँदै आएकोले राष्ट्रिय परीक्षा बोर्डले कक्षा ११ को वार्षिक परीक्षा पनि सम्बन्धित शैक्षिक संस्थाले नै सञ्चालन गर्ने रणनीति लिएको थियो । मकवानपुर क्याम्पसले कक्षा १२ को पठनपाठन असार २६ गतेबाट सञ्चालन गर्दैछ ।
