हेटौंडाः हेटौंडामा जारी स्थानीय तह शहीद स्मृति मकवानपुर गोल्डकपको चौथो संस्करण अन्तर्गत् आज सोमबार दिउँसो विभागीय टोली नेपाल आर्मी र सशस्त्र प्रहरीको नेपाल एपीएफ क्लबबीच खेल हुनेछ । आजको खेलको विजेता टोलीले सेमीफाइनलको यात्रा तय गर्नेछ ।
एपीएफ क्लब फ्रेण्ड्स क्लबलाई पराजित गर्दै क्वार्टरफाइनलमा प्रवेश गरेको हो भने नेपाल आर्मी सिधै क्वार्टरफाइनल चरणमा खेल्दैछ । यसअघि आइतबार बिहान भएको खेलमा फ्रेण्ड्स क्लबलाई नेपाल एपीएफ फुटबल क्लबले ३–० गोलअन्तरले पराजित गरेको थियो भने आइतबार दिउँसो भएको खेलमा खुमलटार युथ क्लबलाई नेपाल पुलिस क्लबले २–१ गोलअन्तरले पराजित गरेको थियो ।
मकवानपुर जिल्ला फुटबल संघको आयोजनामा हेटौंडा–५ स्थित पिप्ले–क्याम्पा रंगशालामा जारी प्रतियोगिताको विजेताले उपाधिसहित नगद १५ लाख नगद पुरस्कार पाउनेछ । प्रतियोगिताको उपविजेताले १० लाख रुपैयाँ प्राप्त गर्नेछ । १२ टिमको सहभागिता रहेको प्रतियोगिताको फाइनल खेल जेठ ३० गते हुनेछ ।
