हेटौंडाः सत्ता गठबन्धन दल नेपाली कांग्रेस बकैया गाउँपालिका कार्य समितिले गठबन्धन नगर्ने घोषणा गरेको छ । आज आइतबार कांग्रेस मकवानपुरको पार्टी कार्यालयमा पत्रकार सम्मेलन गरेर प्रेस विज्ञप्ती जारी गरी कांग्रेस बकैयाले गठबन्धन नगर्ने घोषणा गरेको हो ।

कांग्रेस बकैयाका सभापति दिल बहादुर बोम्जनले गठबन्धन नगर्ने प्रेस विज्ञप्ती प्रस्तुत गर्नुभयो । विज्ञप्तिमा गठबन्धन गर्दा कांग्रेसलाई अल्पकालिन फाइदा हुन सक्ने तर दीर्घकालीन रुपमा यसले नेपालमा कम्युनिष्ट बिस्तारलाई मलजल गरी नेपालको लोकतान्त्रिक आन्दोलनलाई खुम्च्याउने काम हुने जनाइएको छ । स्थानीय निकायको निर्वाचन युवाहरुको परीक्षणको समय भएको उल्लेख गरिएको छ । यूवाहरु स्थानीय तहको निर्वाचनमा प्रतिस्पर्धी पार्टीसँग स्वस्थ प्रतिस्पर्धामार्फत् आफ्नो औचित्य प्रमाणित गर्न तम्सेका छन् । तर गठबन्धन र तालमेलको जबरजस्ती निर्देशन नमानेमा पार्टी छोड्न नेतृत्वको हुकुमी शैली र तुच्छ बचनले उनीहरुको समाज परिवर्तन गर्ने ऊर्जा र उत्साह माथि कुठाराघात गर्ने काम भएको विज्ञप्तीमा उल्लेख छ ।

सभापति लामाले पार्टीको केन्द्रिय निर्देशन अनुसार गठबन्धन दलहरु भित्र मितव्ययी रुपमा चुनाबी प्रतिस्पर्धामा जाने बताउनुभयो । उहाँले जबरजस्ती रुपमा गठबन्धन गर्ने निर्णय प्रति घोर आपत्ति जनाउँदै काङ्ग्रेस बकैयाले विज्ञप्ती जारी गरेको स्पष्ट पानुभयो । सभापति बोम्जनसहित बकैयाका १२ वटै वडाका सभापतिहरुले गठबन्धन नगर्ने विज्ञप्तीमा हस्ताक्षर गरेका छन् ।