हेटौंडा–८, हेटौंडा औद्योगिक क्षेत्रमा एक बालिकालाई खोप लगाइँदै । फाइल तस्वीर ।

हेटौंडाः आज शुक्रबारबाट देशभर १५ महिनादेखि १५ वर्ष उमेर समूहका बालबालिकालाई टाईफाईड रोगविरुद्धको खोप लगाइँदैछ । टाईफाईड खोप अभियानअन्तर्गत मकवानपुर जिल्लाका एक लाखभन्दा बढी बालबालिकालाई खोप लगाइने भएको छ । जिल्लाको मनहरी गाउँपालिकामा बागमती प्रदेशका मुख्यमन्त्री राजेन्द्रप्रसाद पाण्डेले खोप अभियानको शुभारम्भ गर्नु हुनेछ ।

४ लाख ६ हजार १ सय ५३ जनसंख्या रहेको मकवानपुरका १ लाख ८ हजार ४ सय ८६ जना बालबालिकालाई खोप लगाउने लक्ष्य लिइएको छ । खोप लगाउनका लागि विद्यालय तथा स्वास्थ्य चौकी गरी ६ सय ८ वटा खोपकेन्द्रमा तालिम प्राप्त ८ सय ७० खोप कार्यकर्ता र स्वयम्सेवक खटाइएको छ ।
हेटौंडा उपमहानगरपालिकामा १ सय ३५ वटा खोप केन्द्रमा ३ सय जना खोप कार्यकर्तालाई खटाइएको छ । साथै, २ सय ७० जना स्वयम्सेवकलाई पनि खोप केन्द्रमा परिचालन गरिने भएको छ । हेटौंडा उपमहानगरपालिकाको १ लाख ९५ हजार ९ सय ५१ जनसंख्यामध्ये ५० हजार १ सय ६३ जना बालबालिकालाई खोप लगाउने लक्ष्य लिइएको छ ।

थाहा नगरपालिकाको ३९ हजार १ सय ६३ जनसंख्यामध्ये ८ हजार ६ सय १६ जना बालबालिकालाई खोप लगाउने लक्ष्य राखिएको छ । नगरपालिकामा ६५ वटा खोप केन्द्रमा ६० जना खोप कार्यकर्ता र १ सय ३० जना स्वयम्सेवक तोकिएको छ । बागमती गाउँपालिकामा भने बैशाख ५ गतेदेखि मात्र खोप अभियान सञ्चालन गरिने बताइएको छ । बागमती गाउँपालिकाको ३० हजार ६ सय २५ जनसंख्यामध्ये ६ हजार ६ सय २८ जना बालबालिकालाई खोप लगाउने लक्ष्य लिइएको छ । गाउँपालिकाको ५२ वटा खोप केन्द्रमा ६० जना खोप कार्यकर्ता र १ सय ४ जना स्वयम्सेवक खटाइनेछ ।

यस्तै, ४० हजार ६ सय ७१ जनसंख्या रहेको बकैया गाउँपालिकामा ८ हजार ९ सय ४८ जना बालबालिका खोप लक्षित रहेका छन् । गाउँपालिकाको ७६ वटा खोप केन्द्रमा ७६ जना खोप कार्यकर्ता र १ सय ५२ जना स्वयम्सेवक तोकिएका छन् । मनहरी गाउँपालिकामा ४७ हजार १ सय ४४ जनसंख्यामा १० हजार ३ सय ७२ जना बालबालिका खोप लक्षित रहेका छन् । गाउँपालिकाको ४२ वटा खोप केन्द्र्रमा ९० जना खोप कार्यकर्ता र ८४ जना स्वयम्सेवक तोकिएका छन् ।

२५ हजार ८ सय ७१ जनसंख्या रहेको राक्सिराङ गाउँपालिकामा ५ हजार ६ सय ९२ जना बालबालिकालाई खोप लगाउने लक्ष्य लिइएको छ । ४५ वटा खोप केन्द्रमा ५७ जना खोप कार्यकर्ता र ९० जना स्वयमसेवक परिचालन गरिने भएको छ । यस्तै, २१ हजार ९ सय ९२ जनसंख्या रहेका कैलाश गाउँपालिकामा ४ हजार ८ सय ३८ बालबालिकालाई खोप लगाउने लक्ष्य लिइएको छ । ४९ वटा खोप केन्द्रमा ५५ जना खोप कार्यकर्ता र ९८ जना स्वयम्सेवक तोकिएका छन् ।

२१ हजार ६ सय २६ जनसंख्या रहेको भीमफेदी गाउँपालिकामा ४ हजार ७ सय ५८ जना बालबालिका खोप लक्षित रहेका छन् । २८ वटा खोप केन्द्रमा ५७ जना खोप कार्यकर्ता र ५६ जना स्वयमसेवक्लाई जिम्मेवारी दिइएको छ । २४ हजार २ सय ५२ जनसंख्या रहेको मकवानपुरगढी गाउँपालिकामा ५ हजार ३ सय ३९ जना बालबालिका खोप लक्षित रहेका छन् । ३३ वटा खोप केन्द्रमा ४३ जना खोप कार्यकर्ता र ६६ जना स्वयम्सेवक परिचालन गरिएको बताइएको छ । ईन्द्रसरोवर गाउँपालिकाको १३ हजार ७ सय ५८ जनसंख्यामध्ये ३ हजार ३ सय ७ जना बालबालिकालाई खोप लगाउने लक्ष्य राखिएको छ । गाउँपालिकाको २७ वटा खोप केन्द्रमा २७ जना खोप कार्यकर्ता तोकिएको छ ।