हेटौंडाः महिला मिलन बचत तथा ऋण सहकारी संस्थाले बिहीबार २१ औं वार्षिक साधारणसभा गरेको छ । साधारणसभाको उद्घाटन गर्दै हेटौंडा उपमहागनरपालिकाकी उपमेयर मिना कुमारी लामाले ठुलो संख्यामा महिलालाई समेटेर सहकारी संचालन गरेकोमा खुशि व्यक्त गर्नुभएको छ । उहाँले महिलाहरुलाई उत्पादनसँग जोडेर सहकारीले काम गर्नुपर्ने बताउनुभयो । महिलाहरुको ठुलो नेतृत्व गरेको सहकारी भोलिका दिनमा राष्ट्रिय स्तरको सहकारी बन्न सक्ने बताउनुभयो । महिलाहरुलाई सहकारीमा जोडेर उनीहरुको आर्थिक अवस्था परिवर्तन गर्न सक्नुपर्ने भन्दै यस्तो सहकारीलाई राष्ट्रियस्तरमा चिनाउनुपर्ने उपमेयर लामाले बताउनुभयो । उहाँले सहकारीलाई सिस्टममा चलाउनुपर्ने बताउनुभयो । पदमपोखरीको कुनै पनि कार्यमा अहिले महिलाहरुको अग्रणी भूमिका पाएको भन्दै महिलाहरुलाई सहकारीमा जोडेर उनीहरुको आर्थिक अवस्था सबल बनाउन सहकारी लाग्नुपर्ने उपमेयर लामाले बताउनुभयो ।
हेटौंडा उपमहानगरमा पनि सहकारीलाई कसरी अघि लैजाने भनेर छलफल चलिरहेको जानकारी उहाँले गराउनुभयो । हाल सहकारीको ५२ सय ७८ शेयर सदस्य रहेको छ । सहकारीले गत वर्ष ५६ करोड कुल कारोबार गर्दे १ करोड १७ लाख नाफा गर्न सफल भएको छ । यस्तै आगामी आर्थिक वर्षमा ६२ करोड कारोबार गर्ने र १ करोड ४० लाख नाफा गर्ने लक्ष्य राखेको महिला मिलन सहकारीकी अध्यक्ष विष्णुमाया लामाले बताउनुभयो । सहकारीको संस्थापक अध्यक्ष सुकुमाया थिङले २ दशक अघि विरुवा रोपेको सहकारी अहिले धेरै फैलिएको बताउनुभयो । उहाँले अहिले महिला मिलनको सदस्य भनेर देश विदेशसमा समेत चिनिएको भन्दै पुस्तौपुस्तासम्म सहकारी यसरी नै अघि बढ्नुपर्ने बताउनुभयो । महिला मिलनले अहिले ४० लाखसम्म शेयरसदस्यलाई ऋण लगानी गर्दै आएको छ । १५ दिनअघि देखि समूहतगत रुपमा गएर छलफल गरेको सहकारीले बिहीबार कार्यालयमा कोभिडको कारण न्यून सदस्यहरुको उपस्थितिमा साधारणसभा गरेको हो । सहकारीले आफ्नो सदस्यहरुलाई जुम मार्फत जोडेको थियो ।
सहकारीले आफ्नो वार्षिक साधारणसभामा कर्मचारी दिपेश अधिकारीलाई सम्मान गरेको छ । यस्तै शेयर सदस्यहरु तिर्थ कुमारी नेपाल, शान्ति माया हिडडुङ र हिरामाया वाइबालाई सम्मान गरेको छ । त्यस्तै पत्रकार निशा गुरुङलाई पनि सहकारीले सम्मान गरेको छ । कार्यक्रममा हेटौंडा–१२ का वडाअध्यक्ष ललित घलान, हेटौंडा–१३ को वडाअध्यक्ष मनोक वाइबा लगायतको उपस्थिति रहेको थियो ।
