हेटौंडाः शनिबार हेटौंडाको फ्रेन्डसिप भेट्रान्स र सिमरा भेट्रान्सबिच मैत्रीपूर्ण फुटबल प्रतियोगिता भएको छ । सिमरा भेट्रान्सको निमन्त्रणामा बाराको सिमरा रंगशालामा भएको ९ ए साइड मैत्रीपूर्ण फुटबल प्रतियोगितामा हेटौंडाले सिमरालाई पराजित गरेको छ ।
निर्धारित ६० मिनेटको खेलमा फ्रेन्डसिप भेट्रान्स हेटौंडाले सिमरा भेट्रान्सलाई ४–३ गोलअन्तरले पराजित गर्दै जित हात पारेको हो । हेटौंडालाई जित दिलाउनका लागि कृष्ण गुरुङ र मनोज लामाले २/२ गोल गरेका थिए । सिमराको तर्फबाट हरि चौधरी, बिनोद परियार र रुपेन्द्र लालचन्दले समान १/१ गोल गरेपनि टिमलाई हारबाट जोगाउन सकेनन् । युनाल मल्लको कप्तानीमा मैदानमा उत्रिएको हेटौंडाको टिम र सिमराको टिमले मायाको चिनो समेत आदानप्रदान गरेका थिए ।
दुई स्थानका भेट्रान्स खेलाडीहरु बिच आपसी चिनजान बढाउन तथा मित्रतालाई प्रगाढ बनाउनका लागि प्रतियोगिता भएको खेलमा सहभागी हेटौंडाका खेलाडी सुविन घिमिरे बताउनुभयो । अबको केही दिनमा फ्रेन्डसिप भेट्रान्स हेटौंडाको आयोजनामा सिमरा भेट्रान्सले हेटौंडा आएर मैत्रीपूर्ण खेल खेल्ने पनि उहाँले जानकारी दिनुभयो ।
