इन्द्रसरोवार गाउँपालिका–२, सिमखोलामा भएको सुमो दुर्घटना ।

हेटौंडाः मकवानपुरको इन्द्रसरोवार गाउँपालिका–२, सिमखोलामा सुमो दुर्घटना हुँदा मृत्यु भएका चालकको पहिचान खुलेको छ । मृत्यु हुनेमा सुमोचालक पर्सा जिल्लाको सखुवा पर्सोनी गाउँपालिका–४ का ३४ बर्षीय प्रमोद साह रहेको प्रहरीले जनाएको छ ।

आइतबार दिउँसो साढे १२ बजेको समयमा काठमाडौंबाट हेटौंडातर्फ जाँदै गरेको ना १ ज २१२४ नम्बरको सुमो अनियन्त्रित भई सडकबाट ५० मिटर तल खसेको थियो । सुमोमा चालकसहित ५ जना सवार रहेका थिए । सुमोमा सवार ४ जना घाइते भएका थिए । घाइते हुनेहरु सबैजना भारतीय नागरिकहरु हुन् । ४ जना मध्ये १ जनाको अवस्था गम्भिर भएको र ३ जना सामान्य घाइते भएका थिए । उनीहरुलाई उपचारका लागि आइतबार मकवानपुर सहकारी अस्पताल ल्याइएका थिए । उपचारपछि अहिले उनीहरु सबैको स्वास्थ्यमा सुधार आएको जिल्ला प्रहरी कार्यालय मकवानपुरका प्रहरी नायव निरीक्षक देवेन्द्र दासले जानकारी दिनुभयो । उहाँका अनुसार घाइतेहरु सबैको मकवानपुर सहकारी अस्पतालमा उपचार भइरहेको छ ।