हेटौंडाः राष्ट्रिय सभा सदस्यको रिक्त एक सिटको लागी भएको उपनिर्वाचनमा स्वतन्त्र चुनाव लडेका डा. खिमलाल देवकोटा विजयी बनेका छन् । उनले गृहमन्त्री रामबहादुर थापालाई १ हजार ७४ मतले पछि पार्दै विजयी बनेका हुन् । थापाले पाएको ४ हजार १४ मतको ऋण तिर्दै देवकोटाले थप १ हजार ७४ मत पाएका छन् ।
देवकोटाले ५८ जना प्रदेश सांसदको मत पाए । स्थानीय तहबाट १ सय २८ जनाले उनलाई मतदान गरेका थिए ।
बागमती प्रदेशको ४५ सांसदले मात्रै गृहमन्त्री थापालाई मतदान गरे । यस्तै स्थानीय तहतर्फ १ सय ३ जनाले मात्रै थापालाई मतदान गरे ।
यता अर्का उम्मेदवार नेमकिपाका कृष्ण तामाङले २ सांसद र २ जना स्थानीय तहका प्रमुख र उपप्रमुखको मत पाए । उनले प्रदेश सांसदको ९६ मतभार र स्थानीय तहबाट ३६ मतभार प्राप्त गरेका हुन् ।
नेकपा एमालेको आधिकारीक उम्मेदवार थापा भएपनि उनी चुनाव हार्न पुगे । उनलाई राप्रपाको पनि साथ थियो । उनले उम्मेदवारी दर्ता गराउँन आउँदा र चुनावको अघिल्लो दिनसम्म पनि आफ्नो विजयी सुनिश्चित भएको बताएका थिए । एमालेको प्रदेश सभामा ५६ सांसद र स्थानीय तहका १३३ जना प्रमुख/पप्रमुख मतदाता थियो । उनका प्रतिस्पर्धी देवकोटालाई नेपाली कांग्रेस, माओवादी, जसपा र नेकपा वरिष्ठ नेता माधव नेपाल लगायतको साथ थियो ।
बिहीबार हेटौंडाको भुटनदेवी माविमा भएको मतदानमा १ सय ५ सांसद र स्थानीय तहका २३३ जना प्रमुख÷उपप्रमुखले मतदान गरेका थिए । ४ प्रदेश सांसद र ५ जना स्थानीय तहका प्रमुख÷उपप्रमुख अनुपस्थित भएका थिए ।
