हेटौंडाः मकवानपुरमा पर्याप्त अक्सिजन सिलिन्डरहरु भएको प्रमुख जिल्ला अधिकारी भरतमणि पाण्डेले बताउनुभएको छ । उहाँले जिल्लामा अक्सिजन सिलिन्डर अभाव नभएको तर खालि भएका सिलिन्डरमा अक्सिजन भर्नमा समस्या भएको बताउनुभयो । खाली सिलिन्डरमा उद्योगले अक्सिनज भर्न ढिलाई गर्दा समस्या आएकोे उहाँको भनाई छ ।
आइतबार पत्रकारसँग कुरा गर्दै कोभिड अस्पताल बनाइएको हेटौंडा अस्पतालमा दैनिक ठुलो खालको ९० सिलिन्डर प्रयोगमा आइएरहेको उहाँले जानकारी गराउनुभयो । जिल्लामा ३ सय सिलिन्डर अक्सिजन भरेर राखिएको छ । जिल्लामा रहेको ३ अक्सिजन सप्लार्यस र विभिन्न उद्योगहरुको संकलन भएको सिलिन्डर गरी १५ सय थान सिलिन्डर हुन्छ । जिल्लामा ८० प्रतिशत सिलिन्डर औद्योगिक उत्पादनको लागि प्रयोग हुँदै आएको छ भने २० प्रतिशत मात्रै अस्पतालमा प्रयोग भएको छ ।
जिल्लामा पुग्ने अक्सिजन सिलिन्डर भएपनि खालि सिलिन्डरमा उद्योगले समयमै नभरिदिँदा समस्या आउन सक्ने उहाँको भनाई छ । मकवानपुरमा अक्सिजन उत्पादन हुने प्लान्ट छैन । औद्योगिक क्षेत्रमा पनि सबै सिलिन्डर प्रयोग हुँदै आएको छ । जिल्लाबाट खालि सिलिन्डरमा अक्सिजन भर्न चितवन, विरगञ्ज वा अन्य जिल्लामा पठाउनुपर्ने हुन्छ । अन्य जिल्लाहरुको सिलिन्डर उतै राख्ने गरेको पनि पाइयो ।
यसअघि जिल्ला प्रशासन कार्यालय मकवानपुरलाई शिवम् सिमेन्टले ४२ थान अक्सिजन सिलिन्डर दियो । त्यसलाई भर्न चितवन पठाउँदा उतै रोकिएको प्रजिअ पाण्डेको भनाई छ । अक्सिजन भर्ने कारखानामा पठाइएको सिलिन्डर नै उनीहरुको भएकोले उतै रोकियो । विकल्पको लागी हेटौंडा अस्पतालमा अक्सिजन प्लान्ट संचालनमा ल्याउन प्रदेशको सामाजिक विकास मन्त्रालयसँग सहकार्य भइरहेको प्रजिअ पाण्डे बताउनुभयो ।
निषेधाज्ञा लम्बाउँने प्रशासनको तयारी
१९ बैशाखदेखि मकवानपुरका चार स्थानीय तहमा निषेधाज्ञा जारी भयो । हेटौंडा उपमहानगर, थाहा नगर, भीमफेदी गाउँपालिका र मनहरीको हाइवेको ५ सय मिटर दायाँ र बाँया निषेधाज्ञा जारी भएपछि जिल्लामा संक्रमित बढ्को बढ्यौ छ । निषेधाज्ञा नलगाउँदा झनै बढ्ने थियो । अहिलेको अवस्था झनै जोखिमयुक्त भएकोले थप समय लम्बिने देखिएको प्रजिअ पाण्डेले बताउनुभयो । उहाँले जिल्लामा निषेधाज्ञा हुँदा बजार व्यवस्थापन, भीडभाड नियन्त्रण कसरी गर्ने भन्नेबारेमा पत्रकारहरुसँग राय समेत लिनुभएको छ ।
सोमबारबाट सवारीमा कडाई
निषेधाज्ञामा विशेष गरेर हेटौंडामा गुड्ने सवारीहरुमा सोमबाट कडाई गरिने भएको छ । अतिआवश्यक नभई अन्यलाई घरबाहिर ननिस्कन प्रमुख जिल्ला अधिकारी भरमणि पाण्डेले आग्रह गर्नुभएको छ । साना सवारीहरुलाई कडाइ गर्न प्रहरीलाई उहाँले निर्देशन दिने बताउनुभएको हो । साथै उहाँले जिल्लामा एम्बुलेन्सको अभाव सिर्जना हुनै नदिने ढंगले काम गरिरहेको बताउनुभयो । उहाँले एम्बुलेन्स नपाइएमा जिल्ला प्रशासन कार्यालयका प्रशासकिय अधिकृत दिलीप श्रेष्ठलाई ९८४५०२७७९४ मा सम्पर्क गर्न आग्रह गर्नुभयो ।
किसानको तरकारी र दुध बजारसम्म आउने वातावरण बनाइने
प्रमुख जिल्ला अधिकारीले जिल्लाका विभिन्न स्थानमा किसानहरुले उत्पादन गरेको तरकारी, उत्पादन भएको दुधलाई बजारसम्म ल्याएर खपत गराउन पहल गर्ने बताउनुभएको छ । अहिलेको अवस्थामा जिल्ला निषेधाज्ञा कडाईका साथ लम्बिन सक्ने भन्दै नागरिक आफैपनि सर्तक हुनुपर्ने बताउनुभयो ।
