हेटौंडाः रोटरी क्लब अफ मकवानपुरका सदस्य डा. मुकेश बनियाँले बुबा रामेश्वर लाल दास बनियाँ र आमा बेबी बनियाँको बैवाहिक वर्षगाँठको अवसरमा मामाघर नेपाललाई सहयोग गर्नुभएको छ । रोटरी क्लबका अध्यक्ष कविन सांगामीसहित रोटरीका पदाधिकारीको उपस्थितिमा रोटरी क्लबकै व्यानरमा बुधबार सहयोग सामग्री हस्तान्तरण गरिएको हो ।
बनियाँले १५ हजार रुपैयाँ बराबरको खाद्यान्न सामग्री मामाघर नेपाललाई सहयोग गर्नुभएको हो । रोटरी क्लब अफ मकवानपुरका संस्थापक अध्यक्ष ज्ञानकृष्ण प्रजापतिको प्रमुख आतिथ्यमा सहयोग हस्तान्तरण कार्यक्रम गरिएको हो । मामाघर नेपालका संरक्षक अर्पण पराजुलीलाई खाद्यान्न सामग्री सहयोग गरिएको हो ।
सामाजिक सेवाभावले स्थापित अन्तर्राष्ट्रिय सहयोगी संस्था रोटरी इन्टरनेशनलको सदस्य रोटरी क्लब अफ मकवानपुरले आफ्ना सदस्य तथा सदस्यका परिवारको सुखद् सन्दर्भमा विभिन्न सामाजिक संघ, संस्थालाई सहयोग गर्दै आएको छ । केही दिन अघि मात्रै मानवसेवा आश्रमलाई पनि खाद्यान्न सामग्री सहयोग गरेको थियो । आउँदो शनिबार रोटरी क्लबले हेटौंडा–४, कमलडाँडास्थित रोशनी पुस्तकालयलाई पुस्तक हस्तान्तरण कार्यक्रम गर्ने रोटरी क्लब अफ मकवानपुरका अध्यक्ष कविन सांगामीले जानकारी दिनुभएको छ ।
