हेटौंडाः राष्ट्रिय प्रजातन्त्र पार्टीका केन्द्रीय कार्यसम्पादन समितिका सदस्य राजाराम बर्तौलाले राप्रपा आगामी निर्वाचनमा निर्णायक शक्ति बनेर उदाउने दाबी गर्नुभएको छ । सोमबार पार्टीको थाहा नगर समितिको परिषद् बैठकलाई सम्बोधन गर्दै बर्तौलाले राप्रपा गएको चुनावमा हारेको भएता पनि नहराएको बताउनुभयो ।
‘हामी गत चुनावमा पराजित भयौं, तर अब उठेर उच्च मनोबलका साथ अघि बढ्छौं’ बर्तौलाले भन्नुभयो । कांग्रेस र कम्युनिष्टको अदूरदर्शिता र असफलताबाट मुलुकले मुक्ति खोजेको चर्चा गर्दै बर्तौलाले राप्रपालाई बलियो राष्ट्रवादी प्रजातान्त्रिक शक्ति बनाउन युवापुस्ता अघि सर्नुपर्नेमा जोड दिनुभयो ।
कार्यक्रममा राप्रपा मकवानपुरका नेताहरु गुञ्जनबहादुर न्यौपाने, गुरुप्रसाद सापकोटा, शम्भुभक्त श्रेष्ठ, अर्जुन केसी, चन्द्रप्रसाद ढुंगानालगायतले मन्तव्य व्यक्त गनुभएको थियो । थाहा नगर परिषद् बैठकले नवीन रायमाझीको अध्यक्षतामा २९ सदस्यीय कार्यसमिति निर्विरोध निर्वाचित गरेको छ । कार्यसमितिको उपाध्यक्षहरुमा केशर थिङ, राममाया लामा, रामहरि भट्ट रहेका छन् । यसैगरी सचिवमा राधाकृष्ण बिष्ट, कोषाध्यक्षमा पुन्यमान बलामी तथा सहसचिवमा सुरेन्द्र तामाङ चयन हुनुभएको छ ।
