हेटौंडाः बारा जिल्लाको सिमरामा शनिबार सम्पन्न भेट्रान्स फुटबल प्रतियोगिताको उपाधी हेटौंडाको हेटौंडा फुटसल भेट्रान्सले जितेको छ ।
शनिबार भएको फाइनल खेलमा वीरगन्ज युथ एकेडेमी भेट्रान्सलाई ३–१ गोलअन्तरले पराजित गर्दै हेटौंडा फुटसल भेट्रान्सले उपाधी जितेको हो । उपाधीसँगै हेटौंडा फुटसल भेट्रान्सले ३० हजार नगदसहित शिल्ड तथा मेडल प्राप्त गरेको छ । उपविजेता वीरगन्ज युथ एकेडेमी भेट्रान्सले नगद २० हजारसहित शिल्ड र मेडल प्राप्त गरेको छ ।
हेटौंडाका लागि धर्मराज शाहीले २ गोल र सुरज गुरुङले १ गोल गरे । फाइनल खेलको म्यान अफ द म्याच हेटौंडाका धर्मराज शाही घोषित भए । प्रतियोगिताभर ६ गोल गरेका हेटौंडाका सुरज गुरुङ हाइ स्कोरर भए भने बेस्ट मिडफिल्डमा धर्मराज शाही र उत्कृष्ट रक्षकमा हेटौंडाकै मनोज लामा घोषित भए । बिहीबार डुमारवाना भेट्रान्सलाई पराजित गर्दै हेटौंडा फुटसल भेट्रान्स फाइनलमा प्रवेश गरेको हो ।
सेमीफाइनलमा डुमारवानालाई २–१ गोलअन्तरले पराजित गर्दै हेटौंडा फाइनलमा प्रवेश गरेको थियो । त्यसअघि हेटौंडा फुटसल भेट्रान्सले बुधबार जैतापुर भेट्रान्सलाई ५–० गोलअन्तरले पराजित गर्दै सेमीफाइनल प्रवेश गरेको थियो ।
