हेटौंडाः मनहरी गाउँपालिका वडा नम्बर ३ स्थित लालझाडीका बासिन्दा भैरव बहादुर राणालाई हेटौंडाको सामाजिक बिकास मन्डल सानोपोखरा क्लबले आज सहयोग गरेको छ । क्लबले फुडबैंक मार्फत आफ्नो वडामा अशक्त, अपाङ्ग, वृद्धावृद्धलाई सहयोग गर्दै आएको भएपनि आज मनहरीको राणालाई पनि खाद्यान्न सहयोग गरेको क्लबका सल्लाहाकार विशालराज महत्तले बताउनुभयो ।
भैरव बहादुर राणा शारीरिक रुपमा दृष्टिविहीन हुनुहन्छ । खाद्यान्न वितरण सम्बन्धी समाचार सुनेर राणासहित उहाँको श्रीमती हेटौंडा आउनुभएको थियो । अनेरास्ववियू केन्द्रिय सदस्य सन्तोष पौडेलको समन्वयमा सानोपोखरा क्लबले मनहरीका राणालाई १ बोरा चामल, दाल, नुन, मसला लगायतको खाद्यान्न सहयोग गरेको छ ।
सानोपोखरा क्लबको कार्यालय परिसरबाटै आज राणालाई क्लबका अध्यक्ष उमेश महत्त र सल्लाहाकार विशालराज महत्तले सहयोग हस्तान्तरण गर्नुभएकोे हो । यसअघि पनि दृष्टिविहीन राणालाई विभिन्न व्यक्ति तथा संघ संस्थाहरुले सहयोग गर्दै आएका थिए ।
