हेटौँडा : बकैया गाउँपालिका–४ स्थित महेन्द्र माध्यमिक विद्यालयले वार्षिक परीक्षाको नतिजा प्रकाशन गरेको छ । बुधबार शैक्षिक सत्र २०८१ को कक्षा–८ बाहेक प्रारम्भिक बालविकास कक्षादेखि कक्षा–९ सम्मका विद्यार्थीको वार्षिक नतिजा प्रकाशन गरेको हो । यस वर्षको नतीजा राम्रो रहेको प्रधानाध्यापक देवकी सिग्देलले जानकारी दिनुभयो ।
गत शैक्षिक सत्रको तुलना समुत्तीर्ण हुने विद्यार्थीको संख्या बढेको उहाँको भनाइ छ । शैक्षिक सत्र २०८० को वार्षिक परीक्षामा एक सय भन्दा कम संख्यामा मात्रै विद्यार्थी समुत्तीर्ण भएका थिए भने चालु शैक्षिक सत्र २०८१ मा एक सय ८० भन्दा बढी संख्यामा विद्यार्थी समुत्तीर्ण भएको प्रधानाध्यापक सिग्देलले जानकारी दिनुभयो । गाउँपालिकाले तयार पारेको शैक्षिक क्यालेण्डरमा चैत २९ गते वार्षिक परीक्षाको नतीजा प्रकाशन गर्ने उल्लेख भए पनि छिट्टै विद्यार्थी भर्ना अभियान सञ्चालन गर्ने गरी पालिकासँग समन्वय गरेर छिटै नतीजा प्रकाशन गरिएको प्रधानाध्यापक सिग्देलको भनाइ छ ।
महेन्द्र माविमा प्रारम्भिक बालविकास कक्षामा पासाङ घलान, केजीमा मुकेश राई प्रथम हुनुभएको छ । यस्तै, कक्षा–१ देखि ७ सम्म क्रमशः विनय श्रेष्ठ, अब्नि राई, राजकुमार साह, निश्चल महर्जन, बाबुराम थिङ, सम्राट सुनार, रजनिस साह र कक्षा ९ मा मुनुमाया स्याङ्बो प्रथम हुनुभएको छ । विद्यालयले प्रथम, द्वितीय र तृतीय हुने विद्यार्थीले क्रमसः ३ महिना, २ महिना र १ महिना शुल्क मिनाहा गरिदिने छ । साथै विद्यालय प्रथम हुनेको हकमा ३ देखि ४ महिना शुल्क मिनाहा हुने प्रधानाध्यपक सिग्देलले जानकारी दिनुभयो ।
वार्षिक परीक्षाको नतीजा सार्वजनिक गरेसँगै विद्यालयले बिहीबारबाट विद्यार्थी भर्ना अभियानअन्तर्गत घरदैलो अभियान सुरु गरेको छ । विद्यालयले आगामी शैक्षिकसत्रदेखि बस सेवा समेत सञ्चालन गर्ने जनाएको छ । विद्यालयमा बसको सुविधापछि विद्यार्थी बढ्न सक्ने बताउनुभयो । हाल विद्यालयमा ६ सय ५१ जना विद्यार्थी रहेका छन् । विद्यालयले शैक्षिक सत्र २०८२ मा ९ सयको हाराहारीमा विद्यार्थी संख्या पुर्याउने योजना रहेको उहाँले बताउनुभयो ।
