हेटौंडाः लायन्स क्लब अफ हेटौंडा र लायन्स क्लब अफ हेटौंडा भुटनदेवीको संयुक्त आयोजना तथा कृषि तथा वनविज्ञान विश्वविद्यालयको संयोजनमा हेटौंडामा आयुर्वेदजन्य वृक्षरोपण कार्यक्रम भएको छ । लायन्स क्लब इन्टरनेशनल ३२५ बी २ को वृक्षरोपण महाअभियानअन्तर्गत शनिबार हेटौंडा–१० स्थित कृषि तथा वनविज्ञान विश्वविद्यालयअन्तर्गत वनविज्ञान संकायको डीनको कार्यालय परिसरमा आयुर्वेदजन्य वृक्षरोपण कार्यक्रम भएको हो ।
‘वातावरणको संरक्षण गरौं’ भन्ने मूल नाराका साथ बी २ को वृक्षरोपण महाअभियानका क्रममा ३२५ बी २ अन्तर्गतका चार सय भन्दा बढी क्लबहरुले शनिबार एकसाथ वृक्षरोपण गरेको छ । लायन्स क्लब अफ हेटौंडा भुटनदेवीकी अध्यक्ष पुष्पा भट्टको सभाध्यक्षता तथा लायन्स क्लब इन्टरनेशनल ३२५ बी २ का गभर्नर शम्भु नकर्मीको प्रमुख आतिथ्यमा कार्यक्रम भएको हो । कार्यक्रममा कृषि तथा वनविज्ञान विश्वविद्यालयका डीन डा. बलराम भट्टको विशिष्ट आतिथ्य रहेको थियो । ३९ प्रजातिका आयुर्वेदजन्य वृक्षरोपण कार्यक्रमको संयोजन लायन्स क्लब अफ हेटौंडाका अध्यक्ष राजु नेपालले गर्नुभएको थियो ।
