हेटौँडा ः सिन्धुली जिल्लाको कमलामाई नगरपालिका–४ मा भ्यान दुर्घटना हुँदा एकजना मृत्यु भएको छ । मंगलबार दिउँसो ४ बजेर १६ मिनेटको समयमा विपि राजमार्गमा काठमाडौंबाट बर्दिबासतर्फ जाँदै गरेको म प्र ०२–००१ ज ००५४ नम्बरको भ्यान आँफै अनियन्त्रित भई दुर्घटना हुँदा ६ जना घाइते भएको बागमती प्रदेश प्रहरी कार्यालय हेटौँडाले जानकारी दिएको छ ।
दुर्घटनामा महोत्तरी जिल्लाको बर्दिबास नगरपालिका–४ का ५२ वर्षीय भुपाल आले मगर गम्भीर घाइते भएका थिए । घाइते मगरको उपचारको क्रममा बिहीबार बिहान ११ बजेर ७ मिनेटको समयमा ललितपुरस्थित पाटन स्वास्थ्य विज्ञान प्रतिष्ठानमा मृत्यु भएको प्रहरीले जानकारी दिएको छ । घाइते ५ जनालाई सामान्य उपचार पश्चात डिस्चार्ज गरिएको छ ।
