हेटौंडाः अन्तर्राष्ट्रिय स्वयम्सेवी संस्था लायन्स क्लब इन्टरनेशनलले उपलब्ध गराएको एक हजार दुई सय थान भिटिएम हेटौंडास्थित कोरोना परीक्षण प्रयोगशालालाई हस्तान्तरण गरिएको छ । लायन्स क्लब इन्टरनेशनले देशभर २९ हजार छ सय थान भिटिएम हस्तान्तरण गरेको लायन्स क्लब इन्टरनेशनल ३२५ बी २ का गभर्नर शम्भु नकर्मीले जानकारी दिनुभयो ।
लायन्स क्लबले सोमबार एक कार्यक्रमको आयोजना गरी बागमती प्रदेशस्तरीय कोरोना परीक्षण प्रयोगशाला किटजन्य रोग अनुसन्धान तथा तालिम केन्द्रलाई भिटिएम किट हस्तान्तरण गरेको हो । कोरोना भाइरसको परीक्षणको लागि स्वाब संकलन गरी राख्नका लागि भिटिएम किट उपलब्ध गराएको हो । मकवानपुर जिल्ला र अन्य जिल्लाबाट पनि स्वाब परिक्षणका लागि ल्याइने गरिएकोले किटको अभाव हुन नदिन क्लबले किट उपलब्ध गराएकोमा हेटौंडा उपमहानगरपालिकाकी उपमेयर मिना कुमारी लामाले धन्यवाद व्यक्त गर्नुभएको छ ।
लायन्स क्लब इन्टरनेशनल ३२५ बी २ को एरिया चिफ अंकिता सुमार्गीको अध्यक्षतामा भएको कार्यक्रममा हेटौंडा उपमहानगरपालिकाकी उपमेयर मिना कुमारी लामाको प्रमुख आतिथ्यता रहेको थियो । कार्यक्रममा जिल्ला प्रहरी कार्यलय मकवानपुरका प्रहरी नायव उपरीक्षक ईन्द्र बहादुर राना, लायन्स तथा लियो क्लबका पदाधिकारीको उपस्थिति रहेको थियो ।
