हेटौँडाः मकवानपुर जिल्ला लिग फुटबल प्रतियोगिता अन्तर्गत आज समूह चरणको ४ खेल हुँदैछ । हेटौंडा–६, स्थित गौरीटार रंगशालामा दुईवटा र हेटौंडा–११,स्थित सिमलटार मैदानमा दुईवटा गरी ४ खेलहरु हुने भएको हो ।
गौरीटार रंगशालामा हुने पहिलो खेलमा आरआर एफसी र परेली युवा क्लबबीच प्रतिस्पर्धा हुनेछ भने दोस्रो खेलमा रियल स्टार क्लब र एफसी इन्टरनेट सिटीबीच प्रतिस्पर्धा हुनेछ । यस्तै सिमलटार मैदानमा हुने पहिलो खेलमा एफसी इन्टरनेट र हेटौंडा भेट्रान्स बीच प्रतिस्पर्धा हुनेछ भने दोस्रो खेलमा हेटौंडा फुटबल एकेडेमी र गोर्खा ब्वाइजबीच प्रतिस्पर्धा हुनेछ । पहिलो खेल दिउँसो १ बजे हुनेछ भने दोस्रो खेल ४ बजे हुनेछ ।
प्रतियोगितामा २८ क्लबहरुको सहभागिता रहेको छ । प्रतियोगिताको फाइनल खेल असोज ९ गते हुनेछ । लिगको उपाधि विजेता टिमले एक लाख रुपैयाँ प्राप्त गर्नेछन् भने उपविजेता टिमले ५० हजार रुपैयाँ सहित शिल्ड, मेडल तथा प्रमाणपत्र प्राप्त गर्नेछन् ।
