हेटौँडाः मकवानपुर जिल्लाको कैलाश गाउँपालिकामा बुधबार गाउँ शिक्षा योजना निर्माण सम्बन्धी सुझाव संकलन तथा अन्तरक्रिया कार्यक्रम हुँदैछ । सुझाव संकलन कार्यक्रममा पालिकाका वडा अध्यक्ष र माध्यमिक विद्यालयका प्रधानध्यापकहरुको सहभागिता रहने छ ।
शिक्षा शाखाले गत बिहिबार एक सूचना जारी गर्दै पालिकाका मावि तहका विद्यालयका प्रधानाध्यापक, वडा अध्यक्ष लगायतलाई उपस्थितिका लागि अनुरोध गरेको थियो । सुझाव संकलन तथा अन्तरक्रिया कार्यक्रममा दातृ निकायको प्रारम्भिक कक्षा सिकाईको प्राविधिक सहयोग हुने पालिका शिक्षा शाखा प्रमुख दिपेन्द्र अधिकारीले जानकारी दिनुभएको छ ।
पालिकाले शिक्षालाई पहिलो प्राथमिकतामा राखेर छलफल गर्ने शिक्षा शाखा प्रमुख अधिकारीले बताउनुभयो । पालिकाको शैक्षिक क्षेत्र सुधार गर्ने उद्देश्यले विभिन्न संघसंस्था, माविका प्रधानाध्यापकहरुलाई सुझाव संकलण गर्न बोलाएको र कार्यक्रमको आयोजना गरेको उहाँले बताउनुभयो । बुधबार हुने अन्तरक्रियामा पालिकाले पालिकाका १० वटा वडाका अध्यक्ष, ६ वटा माध्यमिक विद्यालयका प्रधानाध्यापक र शिक्षा सम्बन्धी काम गर्ने ३ वटा संघ संस्थालाई बोलाएको छ ।
पालिकाले पहिलो चरणमा प्रधानाध्यापकसँग छलफल गर्ने र दोस्रो चरणमा विद्यार्थीसँग अन्तरक्रिया गर्ने अधिकारीले बताउनुभयो । गाउँपालिकामा ६ वटा मावि, ४ वटा निमावि र ३८ वटा प्राथमिक विद्यालय रहेको अधिकारीले बताउनुभयो । पालिकामा ६ हजार ५ सयको हारहारीमा विद्यार्थी रहेको उहाँले बताउनुभयो ।
