हेटौंडाः साहित्य सङ्गम मकवानपुरको ३५ औं वार्षिकोत्सवको अवसरमा रक्तदान कार्यक्रम भएको छ । आज आइतबार विहान हेटौँडा उपमहानगरपालिका–६ स्थित कृष्ण प्रणामी मन्दिरमा भएको कार्यक्रममा १९ जनाले रक्तदान गरेका छन् ।
कार्यक्रममा ५ जना महिला र १४ जना पुरुषले रक्तदान गरेको रक्तसञ्चार केन्द्र हेटौंडाका प्राविधिक किशोर सापकोटाले जानकारी दिनुभयो । रक्तदान कार्यक्रममा साहित्य सङ्गमका अध्यक्ष डिबि बर्तौलाको अध्यक्षता रहेको थियो । कार्यक्रममा रक्तसञ्चार केन्द्र हेटौंडाको प्राविधिक सहयोग रहेको थियो ।
वार्षिकोत्सवको अवसरमा साहित्य सङ्गमले आइतबार दिउँसो ४ बजेर ३० मिनेटमा हेटौंडा–२, होटल रेडपाण्डामा संयुक्त कविता वाचन तथा सन्ध्या सम्मान कार्यक्रम गर्ने भएको छ । कार्यक्रममा साम्ब ढकाल, सुवास खनाल, प्रतिमा पाठक र अनसूया खनालले कविता वाचन गर्नुहुने जनाएको छ । आगामी भदौ ८ गते हेटौँडा–४ स्थित कृष्ण प्रणामी मन्दिरमा रक्तदान कार्यक्रम आयोजना हुने भएको छ ।
