हेटौँडाः मकवानपुरको मकवानपुरगढी गाउँपालिकाले ३४ जना किसानलाई च्यापकटर उपलब्ध गराएको छ । चालु आर्थिक वर्ष २०८०/०८१ को अनुदान कार्यक्रम अन्तर्गत गत बुधबार गाउँपालिकाका ३४ जना किसानलाई च्यापकटर वितरण गरेको गाउँपालिकाका पशु शाखा प्रमुख सत्यनारायण साहले जानकारी दिनुभयो ।
गाउँपालिकाको ६० प्रतिशत लागत र कृषकको ४० प्रतिशत लागतमा च्यापकटर वितरण गरिएको हो । गाउँपालिकाले च्यापकटर अनुदानवापत १० लाख बजेट छुट्याए पनि ८ लाख २९ हजार रुपैयाँ मात्रै खर्च भएको साहले जानकारी दिनुभयो । च्यापकटर वितरण कार्यक्रममा गाउँपालिकाका प्रमुख दोर्जे लामा स्याङ्तान, उपप्रमुख मानकुमारी पाख्रिन नेपाली ३ नम्बर वडा अध्यक्ष भागवत घिमिरे, ४ नम्बर वडा अध्यक्ष अर्जुन प्रसाद तिमल्सिनाको पनि उपस्थिति रहेको थियो ।
