हेटौँडाः माध्यमिक शिक्षा परीक्षा (एसईई) मा सहभागी भएका मकवानपुरको कैलाश गाउँपालिकाका ११ जना विद्यार्थी मात्रै कक्षा ११ मा भर्ना हुन पाउने भएका छन । गत चैत १५ गते सुरु भई चैत २७ गतेसम्म सञ्चालन भएको एसईईमा कैलाश गाउँपालिकाका ६ वटा विद्यालयबाट १ सय ९९ जना विद्यार्थी सहभागी भएका थिए । परीक्षामा सहभागी १ सय ८८ जना विद्यार्थी नन ग्रेडेड भएका छन् ।
बिहिबार सार्वजनिक भएको नतीजाअनुसार कैलाश गाउँपालिका–२ स्थित कालिदेवी मावि र कैलाश गाउँपालिका–१० स्थित रत्नज्योति माविका कुनै पनि विद्यार्थी कक्षा ११ मा भर्ना हुन योग्य भएनन् । कालिदेवीबाट २६ जना र रत्नज्योतिबाट २४ जना विद्यार्थी एसईईमा सहभागी भएका थिए । कैलाश गाउँपालिका–२ स्थित कमलादेवी माविबाट एसईईमा सहभागी ४५ जना विद्यार्थी मध्ये ३ जना, कैलाश गाउँपालिका–३ स्थित भवानी माविबाट एसईईमा सहभागी ५५ जना विद्यार्थी मध्ये १ जना, कैलाश गाउँपालिका–८ स्थित धुवाङ माविबाट एसईईमा सहभागी ११ जना विद्यार्थी मध्ये १ जना र कैलाश गाउँपालिका–९ स्थित कालिका माविबाट एसईईमा सहभागी ३८ जना मध्ये ६ जना विद्यार्थी मात्रै कक्षा ११ मा भर्ना हुन पाउने भएका छन् ।
