हेटौँडाः नुवाकोट जिल्लाको तार्केश्वर गाउँपालिका–२, ढोरबेसीमा एक जना पुरुष मृत फेला परेका छन् । मृत फेला पर्नेमा ४० वर्षीय चन्द्रमान चित्रकार रहेको बागमती प्रदेश प्रहरी कार्यालय हेटौँडाले जानकारी दिएको छ ।
चित्रकार त्रिशुली नदी नजिक भिरको खोजबाट मंगलबारदेखि हराएका थिए । चित्रकार शुक्रबार साँझ ७ बजेको समयमा ढोरबेसीमा मृत फेला परेका थिए । अनुसन्धानको क्रममा चित्रकारको मानसिक सन्तुलन ठिक नभएको पाइएको प्रहरीले जानकारी दिएको छ ।
सिन्धुपाल्चोक जिल्लाको मेलम्ची नगरपालिका–१२, माझीगाँउमा २५ वर्षीय नाति निरज माझीको कुटपिटबाट घाइते वृद्ध हजुरबुबाको मृत्यु भएको छ । मृत्यु हुनेमा ७२ वर्षीय बिकु मान माझी रहेको बागमती प्रदेश प्रहरी कार्यालय हेटौँडाले जानकारी दिएको छ ।
गत जेठ १३ गते निरजको कुटपिटबाट वृद्ध घाइते भएका थिए । घाइते वृद्धलाई उपचारका लागि न्युरो अस्पताल बाँसबारी काठमाडौं लगिएको थियो । सामान्य उपचार पश्चात जेठ २८ गते डिस्चार्ज भई घर ल्याएकोमा शुक्रबार बिहान ८ बजेको समयमा घरमा नै मृत्यु भएको प्रहरीले जनाएको छ । कुटपिटमा संलग्न निरजको मानसिक सन्तुलन ठिक नभई मानसिक रोगको औषधी सेवन गर्ने गरेको पाइएको प्रहरीले जानकारी दिएको छ ।
