हेटौँडाः मकवानपुरको बागमती गाउँपालिकामा भोलि बुधबारदेखि स्काउटमा आवद्ध विद्यार्थीका लागि तीन दिने स्काउट फ्रेन्डसीप क्याम्प हुने भएको छ । गाउँपालिकाको शिक्षा युवा तथा खेलकुद शाखाको आयोजना तथा नेपाल स्काउट बागमती प्रदेश स्काउट, स्थानीय स्काउटको व्यवस्थापनमा उक्त क्याम्प हुन लागेको हो ।
बागमती–४, झुरझुरेस्थित महाबुद्ध आधारभूत विद्यालयमा क्याम्प हुने हुने स्थानीय स्काउट समितिका आयुक्त राजकुमार राईले जानकारी दिनुभयो । क्याम्पमा हेटौँडा उपमहानगरपालिकाका ५ विद्यालय, मनहरी गाउँपालिका र बागमती गाउँपालिकाका दुई विद्यालयका विद्यार्थी सहभागी हुने उहाँले बताउनुभयो । क्याम्पमा २ सय जनाभन्दा बढी स्काउटका विद्यार्थीहरु सहभागी हुने उहाँले बताउनुभयोे । तीन दिन क्याम्पमा गाउँपालिकाको अध्यक्षसँग विद्यार्थी कार्यक्रम, विभिन्न साहसिक कार्यक्रम, विद्यार्थीको सामाजिक, मानसिक, बौद्धिक र आध्यात्मिक गुणको विकास हुने खालका अतिरिक्त क्रियाकलापहरु सञ्चालन हुने उहाँले बताउनुभयो ।
