हेटौँडाः मकवानपुर प्रहरीले सालको काठसहित एक जनालाई पक्राउ गरेको छ । पक्राउ पर्नेमा मकवानपुरको मकवानपुरगढी गाउँपालिका–२ का २५ वर्षीय आइतसिंह मोक्तान रहेको जिल्ला प्रहरी कार्यालय मकवानपुरका प्रहरी प्रवक्ता लक्ष्मी भण्डारीले जानकारी दिनुभयो ।
प्रहरी चौकी शिव राईगाउँबाट खटिएको प्रहरी टोलीले गस्ती गर्दै जाने क्रममा आइतबार बिहान १ बजेको समयमा मकवानपुरको बागमती गाउँपालिका–२, भुर्कुसटोलबाट बा ५ ख ५४०० नम्बरको टिपरमा चिरान सालको काठ लोड गर्दै गरेको अवस्थामा फेला पारी टिपर चालक मोक्तानलाई पक्राउ गरेको हो । चिरान सालको १ सय ८७ पिस (२ सय १७.४२ क्यूफिट) काठसहित टिपर र चालकलाई प्रहरीले नियन्त्रणमा लिएर थप अनुसन्धान र कारबाहीका लागि डिभिजन वन कार्यालय मकवानपुरमा पठाइएको जनाएको छ ।
