हेटौँडाः हेटौँडा–१९, नेवारपानी चेक पोष्टबाट प्रहरीले लागुऔषध चरेशसहित एक जनालाई पक्राउ गरेको छ । पक्राउ पर्नेमा धादिङ जिल्लाको गजुरी गाउँपालिका–८ का ३३ वर्षीय चीन बहादुर डिमडुङ तामाङ रहेको बागमती प्रदेश प्रहरी कार्यालय हेटौँडाले जानकारी दिएको छ ।
सोमबार दिउँसो ४ बजेर ४५ मिनेटको समयमा इलाका प्रहरी कार्यालय नेवारपानीमा काठमाडौंबाट बीरगंजतर्फ जाँदै गरेको ना ७ ख २०१८ नम्बरको बसमा सुरक्षाजाँच गर्दा बसमा सवार तामाङको साथबाट प्रहरीले लागुऔषध चरेश बरामद गरेको हो । तामाङको साथबाट ७ किलो चरेश बरामद भएको प्रहरीले जानकारी दिएको छ । लागुऔषध चरेशसहित तामाङलाई नियन्त्रणमा लिई अनुसन्धान कार्य भइरहेको र बसलाई गन्तव्यतर्फ पठाएको प्रहरीले जानकारी दिएको छ ।
