हेटौंडाः मकवानपुरको थाहा नगरपालिका–१०, तल्लो बिसिङ्खेलमा आमाको हत्या गरेको आरोपमा प्रहरीले २६ वर्षीय छोरा मिलन गमाललाई पक्राउ गरेको छ । घरायसी विवादका कारण ५० वर्षीया ज्ञानीमाया गमालको हत्या आरोपमा छोरालाई पक्राउ गरिएको बागमती प्रदेश प्रहरी कार्यालय हेटौंडाले जानकारी दिएको छ ।
गत फागुन ३० गते बिहान १० बजेको समयमा घरको ढोका बन्द रहेको र स्थानीयले बोलाउँदा घरको ढोका नखुलेको सूचनापश्चात् इलाका प्रहरी कार्यालय चित्लाङबाट खटिएको प्रहरी टोलीले स्थानीयको उपस्थितिमा ढोका खोली हेर्दा ज्ञानीमाया खाटमा सुतिरहेको अवस्थामा मृत फेला परेकी थिइन् ।
मुचुल्कापश्चात् शव पोष्टमार्टमका लागि टिचिङ अस्पताल पठाइएकोमा सोही दिन नै शव आफन्तले बुझी लगेका थिए । घटनाको थप अनुसन्धानको क्रममा खोज तथा स्थानीयसमेतको अनुसन्धानबाट ज्ञानीमायाका छोरा मिलनले घरायसी विवादको कारण कर्तव्य गरी मारेको खुल्न आएको प्रहरीले जनाएको छ । इलाका प्रहरी कार्यालय पालुङले मिलनलाई थाहा नगरपालिका–१० बाट नियन्त्रणमा लिई थप अनुसन्धानका लागि १० दिनको म्याद थप गरिएको छ ।
