हेटौँडाः हेटौँडा–२ स्थित मकवानपुर बहुमुखी क्याम्पसको ४४ औँ वार्षिकोत्सव कार्यक्रम बिहिबार सम्पन्न भएको छ । स्वतन्त्र विद्यार्थी युनियन (स्ववियु) ले वार्षिकोत्सवको अवसरमा आयोजना गरेको खेलकुद प्रतियोगिताका विजेतालाई पुरस्कार वितरण गरी वार्षिकोत्सव समारोह समापन गरिएको छ ।
विभिन्न प्रतियोगितामा सहभागी एक सय भन्दा बढी विद्यार्थीलाई पुरस्कृत गरिएको छ । कार्यक्रममा विद्यालयका निवर्तमान क्याम्पस प्रमुख डा. शंकरप्रसाद उपाध्यायलाई सम्मान गर्नुका साथै नवनियुक्त क्याम्पस प्रमुख डा. यमबहादुर सिलवाललाई बधाई ज्ञापन गरिएको छ । कार्यक्रममा नेपाल होचा पुड्का संघका कलाकारहरुले नृत्य तथा नाटक प्रस्तुत गरेका छन् ।
स्ववियु अध्यक्ष छोइसाङ लामाको अध्यक्षता तथा बागमती प्रदेश सरकारको सामाजिक विकास मन्त्री कुमारी मोक्तानको प्रमुख आतिथ्यमा वार्षिकोत्सव समारोह भएको हो । कार्यक्रममा क्याम्पस सञ्चालक समितिका अध्यक्ष अनन्तप्रसाद पौडेल, बागमती प्र्रदेश सभा सदस्य एका लाल श्रेष्ठ, जिल्ला समन्वय समिति मकवानपुरका प्रमुख ललित घलान, भीमफेदी गाउँपालिकाका अध्यक्ष हिदम लामा, स्ववियु पूर्वसभापति एवम् हेटौँडा–४ का वडाअध्यक्ष नवीन सिग्देल, क्याम्पस सञ्चालक समितिका सदस्यहरु, प्राध्यापकहरुको पनि आतिथ्य रहेको थियो ।
