हेटौंडाः हेटौंडा–४ स्थित हेटौंडा क्याम्पसमा खेल महोत्सव सुरु भएको छ । हेटौंडा क्याम्पसको ३४ औँ वार्षिक उत्सवको अवसरमा बिहीबारबाट स्यवियु खेलकुद महोत्सव सुरु भएको हो ।
प्रतियोगिताको उद्घाटन स्ववियु अध्यक्ष अभि मैनालीको सभाध्यक्ष तथा क्याम्पस सञ्चालक समिति अध्यक्ष आनन्दराम पराजुलीको प्रमुख आतिथ्यमा भएको हो । उद्घाटन कार्यक्रमलाई सम्बोधन गर्नुहुँदै अध्यक्ष मैनालीले यस्ता प्रकारको महोत्सवले विद्यार्थीहरुको प्रतिभालाई प्रस्तुतिकरण गर्न मद्दत गर्ने विश्वास व्यक्त गर्नुभयो ।
आज शुक्रबारसम्म सञ्चालन हुने महोत्सवमा बिहीबार मैत्रीपूर्ण भलिबल, खुला चम्चा दौड, सटपुट, टेबलटेनिस, विजनेस÷लेसन प्लान प्रतियोगितालगायतका खेलहरु भएको छ । शुक्रबार खुला नृत्य तथा गायन, सय मिटर दौड, लङ्जम्प, डोरी तान्ने र मुक्तक वाचन प्रतियोगिता हुनेछ ।
आइतबार प्रतियोगितामा विजयी भएका खेलाडीहरुलाई एक कार्यक्रमबीच पुरस्कृत गरिने जनाइएको छ । उद्घाटन कार्यक्रममा वडा–४ का अध्यक्ष नवीन सिग्देल, क्याम्पसका प्रमुख देवीराम लामा, क्याम्पसका शिक्षक तथा विद्यार्थीहरुको उपस्थिति रहेको थियो ।
