हेटौँडाः पूर्व–पश्चिम राजमार्ग अन्तर्गत हेटौँडा–१५, रातोमाटे चेकपोष्टबाट मकवानपुर प्रहरीले लागुऔषधसहित १ जनालाई पक्राउ गरेको छ । पक्राउ पर्नेमा हेटौँडा–११, थानाभर्याङ बस्ने ३० वर्षीय रञ्जित स्याङ्तान रहेको बागमती प्रदेश प्रहरी कार्यालय हेटौँडाले जानकारी दिएको छ ।
बुधबार वीरगंजबाट हेटौँडातर्फ आउँदै गरेको बा ३ ख ७८२० नम्बरको बसलाई रोकी सुरक्षाजाँच गर्दा प्रहरीले बसमा सवार स्याङ्तानको साथबाट लागुऔषध फेला पारेको थियो । प्रहरीले स्याङ्तानको साथबाट लागुऔषध नुर्फिन ४६ एम्पुल, फेनार्गन ४६ एम्पुल र डाईजेपाम–४६ बरामद गरेको थियो । लागुऔषधसहित स्याङ्तानलाई नियन्त्रणमा लिई अनुसन्धान गरिरहेको र बसलाई गन्तव्यतर्फ पठाएको प्रहरीले जनाएको छ ।
