हेटौँडाः मकवानपुर प्रहरीले लागुऔषध ओनरेक्ससहित एकजना भारतीय नागरिकलाई पक्राउ गरेको छ । पक्राउ पर्नेमा भारतको मोतिहारी जिल्लाका १७ वर्षीय आरके यादव रहेको जिल्ला प्रहरी कार्यालय मकवानपुरले जनाएको छ ।
शनिबार बिहान ६ बजेर २५ मिनेटको समयमा वीरगञ्जबाट हेटौँडा हुँदै नारायणगढतर्फ जाँदै गरेको ना ७ ख ३५०९ नम्बरको बसलाई रोकी सुरक्षाजाँच गर्ने क्रममा बसमा सवार यादवको साथबाट लागुऔषध बरामद भएको प्रहरीले जनाएको छ । शरीरमा टेपले टाँसेर ल्याएको ६० पिस ओनरेक्स लागुऔषध फेला पारी बरामद गरेको जनाएको छ । उक्त लागुऔषधसहित यादवलाई नियन्त्रणमा लिएर थप अनुसन्धानका लागि जिल्ला प्रहरी मकवानपुरमा ल्याइएको छ भने बसलाई शनिबार नै गन्तव्यतर्फ छोडिदिएको प्रहरीले जनाएको छ ।
