हेटौँडाः मकवानपुरको थाहा नगरपालिका–८, गल्छीबाट प्रहरीले लागुऔषध गाँजा र नगदसहित एक जनालाई पक्राउ गरेको छ । पक्राउ पर्नेमा धादिङ जिल्लाको किरानचोक–४ घर भई हाल गजुरी गाउँपालिका–८ महादेवखर्क बस्ने ४३ वर्षीय सानुकान्छा स्याङ्तान रहेको बागमती प्रदेश प्रहरी कार्यालय हेटौँडाले जानकारी दिएको छ ।
विशेष सुचनाको आधारमा बुधबार साँझ ५ बजेर ३० मिनेटको समयमा ईलाका प्रहरी कार्यालय पालुङबाट खटिएको प्रहरी निरीक्षकको टोलीले पैदलयात्री स्याङ्तानलाई सुरक्षाजाँच गर्दा लागुऔषध गाँजा र नगद फेला पारेको थियो । स्याङ्तानको साथबाट प्रहरीले १० किलो लागुऔषध गाँजा र ७५ हजार रुपैयाँ बरामद गरेको थियो । स्याङ्तानलाई नियन्त्रणमा लिई थप अनुसन्धान भइरहेको प्रहरीले जनाएको छ ।
