हेटौँडाः लागुऔषधसहित दुइजना भारतीय नागरिकलाई मकवानपुर प्रहरीले पक्राउ गरेको छ ।
शनिबार दिउँसो १ बजेर ५० मिनेटको समयमा हेटौँडा–१५, रातोमाटेबाट भारतको बिहार राज्य, पश्चिम चम्पारन भाङ्गा थाना जिल्ला बेतिया घर भई हाल पर्सा जिल्लाको रङपुरटाँडीस्थित मिठाई पसल सञ्चालन गर्दै आएका ४० वर्षीय जगु साह र भारतको बिहार राज्यको मझपपुर मिनापुर थाना मस्ताफा ग्रामका ४० वर्षीया शाहिलदेवीको साथबाट लागुऔषध अफिम १ केजी बरामद गरेको प्रहरीले जनाएको छ ।
बीरगन्जबाट हेटौँडातर्फ आउँदै गरेको बागमती प्रदेश ०१–००६ ख ४८८४ नम्बरको यात्रुबाहक माईक्रोबसलाई रोकी सुरक्षाजाँच गर्ने क्रममा जगु र शाहिलदेवीलाई प्रहरीले पक्राउ गरेको जनाएको छ । लागुऔषधसहित पक्राउ परेका दुबैजनालाई हिरासतमा राखी थप अनुसन्धान गरिरहेको प्रहरीले जानकारी दिएको छ ।
