हेटौँडाः हेटौँडा–४, कमलडाँडास्थित नवोदय शिशु सदन माविको खेलकुद सप्ताहको उद्घाटन गरिएको छ । हेटौँडा–५ स्थित पिप्ले–क्याम्पा रंगशालामा ५ नम्बर वडा अध्यक्ष सुशील घिमिरेले बुधबार खेलकुद सप्ताहको औपचारिक उद्घाटन गर्नुभएको हो । उद्घाटन समारोहमा स्काउटमा सहभागी विद्यार्थीले मार्चपास गरेका थिए ।
गत बिहिबारदेखि नै अनौपचारिक रुपमा सुरु भएको खेलकुद सप्ताह बिहीबारसम्म सञ्चालन हुनेछ । विद्यालय सञ्चालक समितिका अध्यक्ष पुरनबहादुर जोशीको अध्यक्षतामा उद्घाटन कार्यक्रम भएको हो । विद्यालयका सदनबीच भएको खेलकुद सप्ताहमा फुटबल, भलिबल, क्रिकेट, बास्केटबल, एथ्लेटिक्सका खेलहरु भइरहेका छन् । खेलकुद सप्ताहमा ४ कक्षादेखि १० कक्षासम्मका विद्यार्थी सहभागी छन् ।
प्रतियोगिताको उद्घाटन गर्नुहुँदै वडाध्यक्ष घिमिरेले नवोदय शिशु सदनमा विद्यार्थीलाई औपचारिक शिक्षासँगै खेलकुदमा पनि सहभागी गराएर खेलकुदको विकासमा सहयोग पुर्याइरहेको बताउनुभयो । खेलकुदमार्फत स्वस्थ र असल व्यक्तित्व निर्माणमा विद्यालयको सहयोग महत्वपूर्ण हुने वडाध्यक्ष घिमिरेको भनाइ थियो । पिप्ले–क्याम्पा रंगशालामा हुने खेलकुद प्रतियोगिताको अवलोकनका लागि अभिभावकको पनि उपस्थिति रहेको छ ।
