हेटौंडाः मकवानपुरको बकैया गाउँपालिकामा मंगलबारदेखि सुरु हुने पाँचौ संस्करणको पालिकास्तरीय फुटबल प्रतियोगिताको खेल तालिका सार्वजनिक भएको छ । शुक्रबार सिनियर र जुनियर दुबैतर्फको खेल तालिका सार्वजनिक भएको पालिकाका खेलकुद विकास समितिका अध्यक्ष विजय लामा थिङले बताउनुभयो ।
मंगलबार नेपाल सरकारका खेलकुदमन्त्री डिगबहादुर लिम्बुले उद्घाटन गर्नुहुने प्रतियोगिताको उद्घाटन खेलमा सिनियरतर्फको वडा नम्बर २ र ६ बीच प्रतिस्पर्धा हुने भएको छ । बकैया–३ स्थित हात्तीसुँडेमा हुने प्रतियोगिता दिउँसो १ बजे सुरु हुने जनाइएको छ । सिनियरतर्फ बुधबार वडा नम्बर ५ र ७ बीच प्रतिस्पर्धा हुनेछ भने जुनियरतर्फ वडा नम्बर १ र २ बीच प्रतिस्पर्धा हुनेछ । यस्तै, बिहीबार सिनियरतर्फ वडा नम्बर ८ र ९ बीच प्रतिस्पर्धा हुनेछ भने जुनियरतर्फ वडा नम्बर ११ र १२ बीच प्रतियोस्पर्धा हुनेछ ।
प्रतियोगितामा सिनियरतर्फ ७ टिम र जुनियरतर्फ ५ टिमको सहभागिता रहेको छ । प्रतियोगिताको फाइनल खेल पुस २९ गते हुनेछ । प्रतियोगितामा सिनियर र जुनियर टिमको विजेताले एक–एक लाख रुपैयाँसहित शिल्ड, मेडल तथा प्रमाणपत्र प्राप्त गर्नेछन् भने उपविजेता टिमले नगद ५० हजार रुपैयाँ प्राप्त गर्नेछन् ।
