हेटौंडाः आगामी माघ ११ गते हुने राष्ट्रिय सभा निर्वाचनका लागि मकवानपुरमा निर्वाचन अधिकृतको कार्यालय स्थापना गरेको छ । सोमबार निर्वाचन अधिकृत महेन्द्र बहादुर कार्कीले कार्यालयको उद्घाटन गनुभयो । राष्ट्रिय सभामा रिक्त भएका १९ मध्ये बागमती प्रदेशबाट निर्वाचित ४ जना छन् । आगामी माघ ११ गते ४ जना राष्ट्रिय सभा सदस्य चयनका लागि निर्वाचन हुनेछ ।
हेटौंडा–४ स्थित भुटनदेवी माविमा बागमती प्रदेशको मतदानस्थल तोकिएको छ । निर्वाचनका लागि दुई मतदान केन्द्र तोकिएको छ । निर्वाचनमा ३ सय ४७ जनाले मतदान गर्नेछन् । प्रदेश सभा सदस्य १ सय १० जना र २ सय ३७ स्थानीय तहका सदस्यहरुले मतदान गर्नेछन् । निर्वाचन अधिकृतको कार्यालयले आगामी शुक्रबार पुस २० गते मतदाता नामावली प्रकाशन गर्नेछ । पुस २० गते शुक्रबार नै दावी विरोधको उजुरी दिने, पुस २१ गते शनिबार र पुस २२ गते आइतबार निवेदन तथा उजुरीको छानविन र कारबाही गर्ने निर्वाचन अधिकृत कार्कीले बताउनुभयो ।
पुस २२ गते आइतबार अन्तिम मतदाता नामावली प्रकाशन गर्ने, पुस २३ गते सोमबार उम्मेदवारको मनोनयन पत्र दर्ता गर्ने र दर्ता भएको उम्मेदवारको सुची प्रकाशन गरिने जनाएको छ । यस्तै पुस २४ गते मंगलबार उम्मेदवारको विरोधमा उजुरी दिने, पुस २५ गते बुधबार र पुस २६ गते बिहिबार उजुरी माथि जाँचबुझ गरी निर्णय गर्नेछ । पौष २६ गते उम्मेदवारको नामावली प्रकाशन, पुस २७ गते उम्म्देवारले नाम फिर्ता लिने र अन्तिम नामावाली प्रकाशन गर्ने जनाएको छ । मंसिर २८ गते उम्मेदवारलाई निर्वाचन चिन्ह प्रदान गर्ने जनाएको छ ।
कार्यालय स्थापना कार्यक्रममा जिल्ला प्रशासन कार्यालय मकवानपुरका प्रमुख सूर्यप्रसाद सेढाई र जिल्ला प्रहरी कार्यालय मकवानपुरका प्रहरी प्रमुख प्रहरी उपरीक्षक सीताराम रिजालको पनि उपस्थिति रहेको थियो ।
