हेटौंडाः मकवानपुृर जिल्ला क्रिकेट संघको आयोजनामा जारी प्रधानमन्त्री कप क्रिकेट टिम छनोट प्रतियोगितामा ओमनगर क्रिकेट क्लब दोस्रो पटक विजयी भएको छ ।
मंगलबार हेटौंडा–४ स्थित हुप्रचौरमा भएको खेलमा हेटौंडा–२ स्थित मकवानपुर बहुमुखी क्याम्पसलाई २४२ रनले पराजित गर्दै ओमनगर क्रिकेट क्लब विजयी भएको हो ।
टस जितेर पहिलो ब्याटिङ गरेको ओमनगरले निर्धारित ३५ ओभरमा ९ विकेट गुमाएर ३०२ रन बनाएको थियो । ओमनगरबाट शुभ कंसाकारले सर्वाधिक ३९ बलमा ७५ रन बनाएका थिए । गौरव खड्काले २८ बलमा ६८ रन, आशीष श्रेष्ठले ४७ बलमा ४१ रन, पिउस शर्माले १२ बलमा २४ रन, आस्तिक दहालले १८ बलमा २० रन, गोकुल अधिकारीले १० बलमा १६ रन र करण अग्रवालले २६ बलमा ९ रन जोड्न सफल भएका थिए ।
मकवानपुर क्याम्पसबाट इमरान आलमले सर्वाधिक ३ विकेट लिएका थिए । साकार गजुरेलले २ विकेट लिएका थिए । अस्मित कुमार, एमडी ताकिर शेख र सुमित वाग्लेले समान एक–एक विकेट लिएका थिए । जवाफी ब्याटिङमा उत्रिएको मकवानपुर क्याम्पसले १९ ओभर ४ बलमा १० विकेटको क्षतिमा ६० रनमात्र जोड्न सफल भएको थियो ।
मकवानपुर क्यामसबाट तवरेज आलमले सर्वाधिक १९ बलमा १९ रन बनाएका थिए । यस्तै, साकार गजुरेलले ५ रन, मिथिलेस गुप्ताले ६ रन बनाएका थिए । ओमनगरबाट पिउस शर्मा र अर्पणले समान ३–३ विकेट लिएका थिए । शुभ कंसाकारले २ विकेट लिएका थिए ।
दोस्रो पटकको हार व्यहोरेसँगै मकवानपुर क्याम्पस छनोट प्रतियोगिताबाट बाहिरिएको छ । प्रदेश क्रिकेट संघको सदस्य विनोद प्रधानको संयोजकत्वमा भएको प्रतियोगितामा १२ वटा टिमको सहभागिता रहेको छ । प्रतियोगिताको फाइनल खेल पुस १२ गते हुने क्रिकेट संघको सदस्य साजन कुमार शर्माले बताउनुभयो ।
खेलको म्यान अफ द म्याच ओमनगरबाट शुभ कंसाकार घोषित भएका छन् । प्रतियोगितामा सहभागी भएका खेलाडीहरुको प्रदर्शनीको आधारमा पहिलो चरणमा २२ जना खेलाडीहरु छनोट गरी दोस्रो पटक छनोट प्रतियोगितामा सहभागी गराउन प्रदेश पठाउने जनाइएको छ ।
गतवर्ष भएको प्रधानमन्त्री क्रिकेट प्रतियोगितामा मकवानपुरबाट ४ जना छनोट भएका थिए । छनोट हुनेमा रामनरेश गिरी, गौरव खड्का, रिजन ढकाल र शुभ कंसाकार रहेका थिए । प्रतियोगिताअन्तर्गत् बुधबार मकवानपुर क्रिकेट क्लब र रेड स्वाइल क्रिकेट क्लबबीच प्रतिस्पर्धा हुनेछ ।
यसअघि आइतबार हेटौंडा–४ स्थित हुप्रचौरमा भएको खेलमा मकवानपुर क्याम्पस र ओमनगर क्रिकेट क्लबबीच भएको खेलमा पनि ओमनगरले मकवानपुर बहुमुखी क्याम्पसलाई १८१ रनले पराजित गरेको थियो । आइतबार टस जितेर पहिलो ब्याटिङ गरेको ओमनगर क्रिकेट क्लबले निर्धारित ३५ ओभरमा ९ विकेटको क्षतीमा २५० रन बनाउन सफल भएको थियो । ओमनगरबाट शुभ कंसाकारले ६३ रन, गौरव खड्काले विना आउट ३९ रन र गोकुल अधिकारीले ३९ रन बनाएका थिए ।
मकवानपुर क्याम्पसबाट सुमित वाग्लेले ३ विकेट लिएका थिए । मकवानपुर क्याम्पसबाट रोहित केसरीले १४ रन बनाएका थिए । ओम नगरबाट पिउस शर्माले ५ र रोहित ठाकुरले २ विकेट लिएका थिए । जवाफी ब्याटिङमा उत्रिएको मकवानपुर क्याम्पसले १७ ओभरमा सबै विकेट गुमाएर ६९ रनमात्र जोड्न सफल भएको थियो ।
मकवानपुरबाट रोहित केसरीले १० बलमा १४ रन बनाएका थिए । आइतबार भएको खेलको म्यान अफद म्याच ओम नगरका पिउस शर्मा घोषित भएका छ्न् ।
