हेटौंडाः प्रहरी कार्यालय अमलेखगन्ज र प्रहरी चौकी पथलैया बाराबाट खटिएको प्रहरी टोलीले बस र मारुती भ्यानबाट ३ लाख ३५ हजार रुपैयाँ बराबरको अवैध प्याज र जुत्ता जफत गरेको छ ।
सोमबार जिल्ला प्रहरी कार्यालय बाराबाट खटिएको विशेष प्रहरी टोलीले जीतपुर–सिमरा उपमहानगरपालिका–२१, अमलेखगंजबाट बा १७ च ७७८० नम्बरको मारुती भ्यान र सिमरा उपमहानगरपालिका–१ पथलैया चोकबाट प्र १–०१–००१ ख ३५७८ नम्बरको यात्रुबाहक बसबाट अवैध प्याज र जुत्ता बरामद गरेको जिल्ला प्रहरी कार्यालय बाराका प्रवक्ता प्रहरी नायव उपरीक्षक दधिराम न्यौपाने जानकारी दिनुभयो ।
प्रहरीले मारुती भ्यानबाट विभिन्न किसिमको जुत्ता २ सय ४३ जोर २ लाख ८० हजार ५ सय रुपैयाँको र यात्रुबाहक बसबाट प्याज १० क्विन्टल ५५ हजार बराबरको अवैध सामान नियन्त्रणमा लिएको थियो । सामानहरू नियन्त्रणमा लिई आवश्यक अनुसन्धान भइरहेको छ । मारुती भ्यानलाई नियन्त्रणमा लिई बसलाई गन्तव्यतर्फ पठाएको प्रवक्ता न्यौपाने जानकारी दिनुभयो ।
