हेटौँडाः गजल मञ्च मकवानपुरको आयोजनामा २०८ औँ नियमित गजल श्रृङ्खला शनिबार भएको छ । साहित्य संगम मकवानपुर तथा सिस्नुपानी मकवानपुरको सभाहलमा गजल मञ्च मकवानपुर अध्यक्ष केशव समर्पणको सभाध्यक्षमा तथा सर्जक सञ्जाल मकवानपुरका संयोजक निमेष निखिलको प्रमुख आतिथ्यमा गजल श्रृङ्खला भएको हो ।
गजल श्रृङ्खलालाई सम्बोधन गर्नुहुँदै संयोजक निमेष निखिलले गजल मञ्चले २० वर्षदेखि गजलको विकास गर्ने काम गरिरहेको बताउनुभएको छ । उहाँले मोतीराम भट्टले गजलको श्रृंगारिक रुपमा स्थापना गरेको बताउनुहुँदै पछिल्लो समयमा मानिसहरुले गजल लेख्ने प्रयास नगरेकोले लेख्न शैलीको विकासमा कमी आएको बताउनुभयो । अध्यक्ष केशव समर्पणले गजल मञ्चले नयाँ गजलकारको स्थापना गर्ने उद्देश्यले विद्यालयमा पनि गजलको कार्यक्रमहरु गर्ने गरेको बताउनुभयो । विधा, भाव, आकर्षण र प्राविधिक लगायतको कुराहरुलाई गजलमा समावेश गर्नुपर्ने उहाँले बताउनुभयो । गजल मञ्च मकवानपुरले हरेक महिनाको पहिलो शनिबारको दिन गजल श्रृङ्खला आयोजना गर्ने गरेको छ ।
कार्यक्रममा दीपक गौतम, सुवास सजल, पुरुषोत्तम आचार्य, सानु खनाल, सुनिल गौतम, निमेष निखिल, हरि पौड्याल र केशव समर्पणले गजल वाचन गर्नुभएको थियो । कार्यक्रममा गजल मकवानपुरको पूर्व अध्यक्ष देवराज तिवारी, सिस्नुपानी मकवानपुरका अध्यक्ष राजकुमार लामिछाने , सहसचिव सम्प्रस पौडेल लगायतको उपस्थिती रहेको थियो ।
