हेटौंडाः मकवानपुर प्रहरीले हेटौंडा–१५ चुरियामाई पिपल चौताराबाट ठूलो परिमाणको पटाकासहित २ जनालाई पक्राउ गरेको छ । पक्राउ पर्नेमा काठमाडौं जिल्लाको दक्षिणकाली नगरपालिका–१ का ४६ वर्षीय केशव नगरकोटी र भक्तपुर जिल्लाको मध्यपुर ठिमी नगरपालिका–७ का ३० वर्षीय सञ्जय शाही रहेको जिल्ला प्रहरी कार्यालय मकवानपुरले जनाएको छ ।
शुक्रबार रातोमाटेबाट खटिएको प्रहरी बल नायव निरीक्षकको टोलीले पथलैयाबाट हेटौंडा आउँदै गरेको ना १ ज ६५६६ नम्बरको सुमोलाई सुरक्षा जाँच गर्दा सुमोमा लुकाई ल्याएको अठैचा नामको पटाका ४५ वटा बण्डलमा ६३ हजार पिस बरामद गरेको थियो । पटाकासहित दुवै जनालाई नियन्त्रणमा लिई अनुसन्धानका लागि जिल्ला प्रहरी कार्यालय मकवानपुर लगिएको प्रहरीले जानकारी दिएको छ ।
