हेटौँडाः जेसीआई हेटौँडा लेडीले जेसीज सप्ताह अन्तर्गत आयोजना गरेको स्व. बुद्धरत्न शाक्य स्मृति वक्तृत्वकला प्रतियोगितामा सुनिल न्यौपाने प्रथम हुनुभएको छ । बुधबार दिउँसो हेटौँडा क्याम्पसको सभाकक्षमा भएको प्रतियोगितामा सहभागी ५ जना मध्ये सुनिल प्रथम हुनुभएको हो । देशको आर्थिक सुधारमा युवाको भूमिका” विषयक् वक्तृत्व कला प्रतियोगितामा कृतिका लौँडारी द्वितीय हुँदा उचित बजगाई तृतीय हुनुभएको छ ।
वक्तृत्वकला प्रतियोगितामा प्रथम, द्वितीय र तृतीय हुनेलाई जेसीज सप्ताहको समापन समारोहमा आगामी शनिबार पुरस्कृत गरिनेछ । प्रतियोगितामा प्रथम, द्वितीय र तृतीय हुनेले क्रमशः ५ हजार, ३ हजार र २ हजार रुपैयाँ प्राप्त गर्नेछन् । वक्तृत्वकला प्रतियोगिता पवित्रा गुरुङको संयोजकत्वमा भएको हो । जेसीआई हेटौँडाकी अध्यक्ष डिलमाया घर्तीको अध्यक्षता तथा हेटौँडा क्याम्पस सञ्चालक समितिका अध्यक्ष आनन्दराम पराजुलीको प्रमुख आतिथ्यमा वक्तृत्वकला प्रतियोगिता भएको हो । कार्यक्रममा जेसीआई हेटौँडाका अध्यक्ष श्रवणकुमार बर्तौला, जेसीआई हेटौँडा लेडीकी पूर्वअध्यक्ष एवम् हालका प्रमुख सल्लाहकार सुशीला पौडेलको पनि आतिथ्य रहेको थियो ।
