हेटौँडाः भारतमा जारी एक दिवसीय आइसिसी पुरुष क्रिकेट विश्वकप क्रिकेट अन्तर्गत आज आइतबार तालिकाको शीर्षस्थानको भारत र पुछारको इंग्ल्याण्डबीच खेल हुँदैछ । भारत र इंग्ल्याण्डबीचको खेल लखनउस्थित अटलबिहारी बजपेयी रंगशालामा नेपाली समयअनुसार दिउँसो २ बजेर १५ मिनेटमा सुरु हुनेछ ।
अपराजित भारत यसअघिका ५ वटा खेलमा जित निकाल्दै १० अंकसहित दोस्रो स्थानमा रहेको छ भने इंग्ल्याण्डले ५ मध्ये ४ खेलमा हार व्यहोर्दै २ अंकसहित तालिकाको पुछारमा रहेको छ । समान १० अंक भए पनि ६ खेल खेलेको दक्षिण अफ्रिका नेट रनरेटका आधारमा शीर्षस्थानमा छ । आजको खेलमा जित निकाल्दै भारत शीर्षस्थानमा उक्लने योजनामा रहनेछ भने साविक विजेता इंग्ल्याण्ड जित निकाल्दै सेमीफाइनल खेल्ने सम्भावनालाई जिवितै राख्न चाहान्छ ।
