हेटौँडाः मकवानपुर जिल्लामा बागमती प्रदेशस्तरीय उसु प्रतियोगिता हुने भएको छ । प्रतियोगिता मकवानपुर जिल्ला उसु संघको आयोजना तथा जिल्ला खेलकुद विकास समितिको समन्वयमा हुने मकवानपुर जिल्ला उसु संघका सचिव विश्वनाथ पाठकले बताउनुभयो ।
प्रतियोगितामा सातै प्रदेशबाट खेलाडीहरु सहभागी हुनेछन् । सहभागीहरुमा आर्मी र पुलिस क्लबहरुका खेलाडीहरु पनि रहने जिल्ला उसु संघका सचिव पाठकले जानकारी दिनुभयो । महिलातर्फ ४५ केजीदेखि ७० केजीसम्मका तथा पुरुषतर्फ ४५ केजीदेखि ८० केजीसम्मका खेलाडीहरु सहभागी हुने सचिव पाठकले बताउनुभयो ।
प्रतियोगितामा ४५ देखि ४८ केजी, ४८ देखि ५२ केजी, ५२ देखि ५६ केजी, ५६ देखि ६० केजी, ६० देखि ६५ केजी, ६५ देखि ७० केजी, ७० देखि ७५ केजी र ७५ देखि ८० केजी तौलसम्मका खेलाडीहरु बीच प्रतिस्पर्धा हुने पनि उहाँले बताउनुभयो । प्रतियोगितामा बागमती प्रदेश र मकवानपुर जिल्ला उसु संघको छुट्टाछुट्टै टिम हुने उहाँको भनाइ छ । प्रतियोगितामा ‘थाउलो एजेन्ट’ र ’इभेन्ट एजेन्ट’ पनि हुने उहाँले बताउनुभयो ।
